മണപ്പുറം ഫൗണ്ടേഷന്റെയും എസ്.എൻ പുരം ലയൺസ് ക്ലബിന്റെയും നേതൃത്വത്തിൽ ഒരുക്കുന്ന സ്നേഹ ഭവനത്തിന്റെ തറക്കല്ലിടൽ കർമ്മത്തിൽ നിന്ന്.മണപ്പുറം ഫൗണ്ടേഷന്റെയും എസ്.എൻ പുരം ലയൺസ് ക്ലബിന്റെയും നേതൃത്വത്തിൽ ഒരുക്കുന്ന സ്നേഹ ഭവനത്തിന്റെ തറക്കല്ലിടൽ കർമ്മത്തിൽ നിന്ന്.
കൊടുങ്ങല്ലൂർ: മഴയൊന്നു കനക്കമ്പോൾ രാജിയുടെ മനസിൽ ഭയത്തിന്റെ കാർമേഘങ്ങൾ ഉരുണ്ടുകൂടും. സുരക്ഷിതമല്ലാത്ത കൂരയ്ക്ക് ചുവട്ടിൽ പറക്കമുറ്റാത്ത മകളെയും കൊണ്ട് കഴിഞ്ഞിരുന്ന ഭൂതകാലമുണ്ടായിരുന്നു രാജിക്ക്. നാലുകാലുകളിൽ വലിച്ചുകെട്ടിയ ടാർപോളിൻ ഷീറ്റിന് താഴെ അന്തിയുറങ്ങിയ ആ ദിവസങ്ങളെ ഒരു ദുഃസ്വപ്നം പോലെ മറക്കാൻ ശ്രമിക്കുകയാണ് രാജിയിപ്പോൾ. എടവിലങ്ങ് വടശ്ശേരി ശശിയുടെ മകൾ രാജിയുടെ ഒരു വീടെന്ന സ്വപ്നത്തിന് പിന്തുണയുമായി ലയൺസ് ക്ലബ് രംഗത്തെത്തി. മണപ്പുറം ഫൗണ്ടേഷന്റെയും എസ്.എൻ പുരം ലയൺസ് ക്ലബിന്റെയും നേതൃത്വത്തിൽ രാജിക്ക് സ്‌നേഹഭവനം ഒരുങ്ങുകയാണ്.
വീടിന്റെ തറക്കലിടൽ കർമ്മം ലയൺസ് ക്ലബ് ഡിസ്ട്രിക്ട് ഗവർണർ സുഷമ നന്ദകുമാർ നിർവഹിച്ചു. എസ്.എൻ പുരം ലയൺസ് ക്ലബ് പ്രസിഡന്റ് ജയന്തി രവീന്ദ്രൻ അദ്ധ്യക്ഷയായി. സമൂഹത്തിലെ നിർദ്ധനർക്കും വിധവകൾക്കുമായി നടത്തുന്ന 'ഹോം ഫോർ ഹോംലെസ്' പദ്ധതിയുടെ ഭാഗമായാണ് ലയൺസ് ക്ലബ് വീട് നിർമ്മിച്ചുനൽകുന്നത്.
കൂടാതെ വിദ്യാലയങ്ങളിലെ അടിസ്ഥാന സൗകര്യ വികസനം, ഭിന്നശേഷിക്കാർക്കുള്ള മുച്ചക്ര വിതരണം, വനിതകൾക്കായുള്ള സ്വയംതൊഴിൽ പരിശീലനം തുടങ്ങി നിരവധി സന്നദ്ധ സേവന പ്രവർത്തനങ്ങളാണ് ലയൺസ് ക്ലബിന്റെ നേതൃത്വത്തിൽ പുരോഗമിക്കുന്നത്. ഹോം ഫോർ ഹോംലെസ് പദ്ധതിയുടെ കോ- ഓർഡിനേറ്റർ രാമനുണ്ണി, ലയൺസ് ക്ലബ് ചീഫ് പി.ആർ.ഒയും ഡിസ്ട്രിക്ട് കോ- ഓർഡിനേറ്ററുമായ കെ.എം. അഷറഫ്, ഏരിയ ലീഡർ വിൻസൺ ഇലഞ്ചിക്കൽ, കബീർ, സജിൻ ആർ. കൃഷ്ണൻ, വിഷ്ണു എന്നിവർ പ്രസംഗിച്ചു. ക്ലബ് ഭാരവാഹികളായ ഷാനി സജിൻ, രവീന്ദ്രൻ, ദിലീപ്, സുനിൽ പി. മേനോൻ, അനിൽകുമാർ, ശ്രീരേഖ, ട്രഷറർ ധന്യ കെ. ബിനോയ് എന്നിവർ സംബന്ധിച്ചു.