ബാലരാമപുരം: കേരളകൗമുദി ബോധപൗർണമി ക്ലബ്,​ ബാലരാമപുരം ജനമൈത്രി പൊലീസ്,​ എക്സൈസ് വകുപ്പ് എന്നിവയുടെ സംയുക്താഭിമുഖ്യത്തിൽ ലഹരി വിരുദ്ധ സെമിനാറും, ബോധവത്കരണ ക്ലാസും കോട്ടുകാൽക്കോണം മുത്താരമ്മൻകോവിൽ ഹയർസെക്കൻഡറി സ്കൂളിൽ ബാലരാമപുരം സി.ഐ ബിജുകുമാർ ഉദ്ഘാടനം ചെയ്തു. ലഹരി നാടിന്റെ വിപത്താണെന്നും സ്കൂളുകളിൽ ലഹരിയെത്തിക്കുന്ന മാഫിയാസംഘങ്ങൾക്കെതിരെ വിദ്യാർത്ഥികൾ പൊലീസിനോട് തുറന്നു പറയാൻ ആർജ്ജവം കാണിക്കണമെന്നും സി.ഐ അഭിപ്രായപ്പെട്ടു.

ലഹരിക്കെതിരെ കേരളകൗമുദി നടത്തിവരുന്ന ബോധപൗർണമി ക്ലബിന്റെ പ്രവർത്തനങ്ങളെയും

സി.ഐ അഭിനന്ദിച്ചു. കേരളകൗമുദി പ്രാദേശിക ലേഖകൻ പ്രേംകുമാർ എം.എസ് ബോധപൗർണമി സന്ദേശം നൽകി. എക്സൈസ് പ്രിവന്റീവ് ഓഫീസർ ലോറൻസ് നയിച്ച ലഹരി വിരുദ്ധ ക്ലാസും ശ്രദ്ധേയമായി. സ്കൂൾ വിദ്യാർത്ഥി ആർഷ.യു ലഹരി വിരുദ്ധ പ്രതിജ്ഞ ചൊല്ലി. ലഹരിക്കെതിരെ സന്ദേശവുമായി സംസ്കൃത അദ്ധ്യാപിക പ്രഭ കവിത ചൊല്ലി. വാർഡ് മെമ്പർ സുനിൽകുമാർ,​ ഫ്രാബ്സ് ജനറൽ സെക്രട്ടറി ബാലരാമപുരം അൽഫോൺസ്,​ ഹെഡ്മിസ്ട്രസ് കലാകുമാരി,​ പി.ടി.എ പ്രതിനിധി ശശികുമാർ എന്നിവർ ലഹരിക്കെതിരെ വിദ്യാർത്ഥികൾക്ക് സന്ദേശം നൽകി.സെമിനാറിന്റെ ഉദ്ഘാടനത്തോടനുബന്ധിച്ചുള്ള ആദ്യ സെഷനിൽ പി.ടി.എ പ്രസിഡന്റ് ആർ.എസ്.വസന്തകുമാരിയും തുടർന്ന് നടന്ന ബോധവത്കരണ ക്ലാസിൽ വൈസ് പ്രസിഡന്റ് അനിൽകുമാറും അദ്ധ്യക്ഷത വഹിച്ചു. കേരളകൗമുദി എന്റെ കൗമുദി ഉദ്ഘാടനവും സ്കൂളിൽ നടന്നു. സ്കൂൾ പ്രിൻസിപ്പൽ ശ്രീകുമാരി സ്വാഗതവും ഹയർസെക്കൻഡറി ഇക്കണോമിക്സ് വിഭാഗം അദ്ധ്യാപകൻ കുമാർ നന്ദിയും പറഞ്ഞു.