തിരുവനന്തപുരം: മലയാളി സ്റ്റാർട്ടപ്പായ ഫാർമേഴ്സ് ഫ്രഷ് സോണിന് ഫിക്കിയുടെ 'ദി മോസ്റ്റ് ഇന്നൊവേറ്റീവ് അഗ്രി സ്റ്റാർട്ടപ്പ്' പുരസ്‌കാരം ലഭിച്ചു. ന്യൂഡൽഹിയിൽ നടന്ന ചടങ്ങിൽ ഫാർമേഴ്സ് ഫ്രഷ് സോണിന്റെ സഹസ്ഥാപകനും സി.ഇ.ഒ.യുമായ പ്രദീപ് പി.എസിന് കൃഷി, കർഷകക്ഷേമ മന്ത്രി കൈലാഷ് ചൗധരി അവാർഡ് സമ്മാനിച്ചു. ഇതാദ്യമായാണ് കേരളം ആസ്ഥാനമായുള്ള ഒരു സ്റ്റാർട്ടപ്പിന് ഫിക്കി പുരസ്‌കാരം ലഭിക്കുന്നത്.

ഫിക്കി ടാസ്‌ക് ഫോഴ്സ് അഗ്രി സ്റ്റാർട്ടപ്പ് ചെയർമാൻ ഹേമന്ദ്ര മാത്തൂർ, പി.ഡബ്ളിയു.സി പാർട്ട്ണർ അശോക് വർമ്മ, യു.എസ്.എസ്.ഇ.സി. ഇന്ത്യ ടീം ലീഡ് ജയ്സൺ ജോൺ,ഫിക്കി അഡ്വൈസർ പ്രവേഷ് ശർമ്മ എന്നിവരുടെ സാന്നിദ്ധ്യത്തിലായിരുന്നു അവാർഡ് ദാനം. ചടങ്ങിൽ എ.പി.ഇ.ഡി.എ. സെക്രട്ടറി ഡോ. സുധാൻഷു, കൃഷി, കർഷക ക്ഷേമ മന്ത്രാലയം ജോയിന്റ് സെക്രട്ടറി ശുഭ താക്കൂർ എന്നിവരുൾപ്പെടെ മന്ത്രാലയത്തിലെ ഉദ്യോഗസ്ഥരും പങ്കെടുത്തു. നിലവിൽ കൊച്ചി, തിരുവനന്തപുരം, തൃശൂർ, കോട്ടയം, കോയമ്പത്തൂർ എന്നീ അഞ്ച് നഗരങ്ങളിലാണ് ഫാർമേഴ്സ് ഫ്രഷ് സോൺ പ്രവർത്തിക്കുന്നത്.