തിരുവനന്തപുരം: തുലാവർഷം തുടങ്ങിയിരിക്കെ തിങ്കളാഴ്ച വരെ സംസ്ഥാനത്ത് മഴ പെയ്യും. മദ്ധ്യ കേരളത്തിലാണ് ശക്തമായ മഴ.ഉച്ചയ്ക്കുശേഷം ഇടിമിന്നലിനും സാദ്ധ്യതയുള്ളതിനാൽ ജനങ്ങൾ ജാഗ്രത പാലിക്കണമെന്ന് ദുരന്തനിവാരണ അതോറിട്ടി അറിയിച്ചു.

കേരളം, തമിഴ്നാട്, കർണാടകം, ലക്ഷദ്വീപ് തീരങ്ങളിൽ മത്സ്യബന്ധനത്തിന് തടസമില്ല. പത്തനംതിട്ട, കോട്ടയം, ഇടുക്കി എന്നിവിടങ്ങളിൽ ഇന്ന് ഓറഞ്ച് അലർട്ടും തിരുവനന്തപുരം, കൊല്ലം, ആലപ്പുഴ, എറണാകുളം, തൃശ്ശൂർ, പാലക്കാട്, മലപ്പുറം, കോഴിക്കോട്, വയനാട് ജില്ലകളിൽ യെല്ലോ അലർട്ടും പ്രഖ്യാപിച്ചിട്ടുണ്ട്.താഴ്ന്ന പ്രദേശങ്ങളിൽ വെള്ളപ്പൊക്ക സാദ്ധ്യതയുണ്ട്. ബംഗാൾ ഉൾക്കടലിനും തെക്കേ ഇന്ത്യയ്ക്കും മുകളിലായി വടക്ക് കിഴക്കൻ കാറ്റ് ശക്തി പ്രാപിക്കുന്നതിന്റെയും ബംഗാൾ ഉൾക്കടലിന്റെയും ശ്രീലങ്കൻ തീരത്തിന്റെയും മുകളിലായി നിലനിൽക്കുന്ന ചക്രവാതചുഴിയുടെയും സ്വാധീനഫലമായിട്ടാണ് മഴ ലഭിക്കുന്നത്.