തി​രുവനന്തപുരം: കേരള ആർട്സ് ആൻഡ് ക്രാഫ്റ്റ്സ് വില്ലേജിൽ 9 മുതൽ 13 വരെ നടക്കുന്ന ഇന്റർനാഷണൽ ഇൻഡീ മ്യൂസിക് ഫെസ്റ്റി​വലിന്റെ (ഐ.ഐ.എം.എഫ്) പ്രചാരണാർത്ഥം ഇന്ത്യയി​ൽ ആദ്യമായി സംഘടി​പ്പി​ച്ച സൈക്കി​ൾ ഡിജെയിംഗ് മാനവീയം വീഥി​യി​ൽ നടന്നു. ട്രിവാൻഡ്രം ബൈ സൈക്കിൾ മേയർ പ്രകാശ്.പി.ഗോപിനാഥ് ഫ്ളാഗ് ഓഫ് ചെയ്ത പരിപാടിയിൽ 150ഓളം സൈക്ലിസ്റ്റുകളും റോളർ സ്‌കേറ്റർമാരും പങ്കെടുത്തു. ഇൻഡസ് സൈക്ലിംഗ് എംബസി, ബിയോൺഡ് സെവൻ, സ്‌കേറ്റ് ഡെലിക്സ് എന്നിവയുടെ സഹകരണത്തോടെ നടന്ന പരി​പാടി​യി​ൽ ഡി.ജെ രാഹുൽ സൈക്കി​ളി​ൽ സഞ്ചരി​ച്ച് ഡിജെയിംഗ് നടത്തി​. ഫ്ളാഗ് ഓഫ് ചടങ്ങിൽ കോട്ടൺഹിൽ സ്കൂളി​ലെ എട്ടാം ക്ളാസ് വിദ്യാർത്ഥിനി എസ്.ആർദ്രാ സുരേഷിന് ക്രാഫ്റ്റ്സ് വില്ലേജ് സൈക്കിൾ സമ്മാനിച്ചു.

കേരളത്തിന്റെ ആദ്യ രാജ്യാന്തര ഇൻഡീ സംഗീതോത്സവമായ ഐ.ഐ.എം.എഫി​ൽ ഇന്ത്യയ്ക്കു പുറത്തുനിന്നുള്ള ഏഴു പ്രമുഖ ബാൻഡുകൾക്കും ഗായകർക്കുമൊപ്പം ഇന്ത്യയിലെ 14 പ്രമുഖ ബാൻഡുകളും സംഗീതപരിപാടികൾ അവതരിപ്പിക്കും. ലേസീ ഇൻഡീ മാഗസീനിന്റെ സഹകരണത്തോടെയാണ് ഫെസ്റ്റിവൽ സംഘടിപ്പിക്കുന്നത്.