വാമനപുരം: പൊതുവിദ്യാഭ്യാസ മേഖലയിൽ വൻ കുതിപ്പുമായി വാമനപുരം നിയോജക മണ്ഡലം. മണ്ഡലത്തിലെ ഏഴ് സ്കൂളുകളിലെ വിവിധ പദ്ധതികൾ മന്ത്രി വി.ശിവൻകുട്ടി ഉദ്ഘാടനം ചെയ്തു.പൊതുവിദ്യാലയങ്ങളുടെ അടിസ്ഥാന സൗകര്യ വികസനത്തിനൊപ്പം അക്കാഡമിക് നിലവാരം ലോകോത്തരമാക്കുന്ന രീതിയിലാകും സംസ്ഥാന സർക്കാരിന്റെ തുടർ നടപടികളെന്ന് മന്ത്രി പറഞ്ഞു. പനവൂർ ഗ്രാമപഞ്ചായത്തിലെ ആട്ടുകാൽ യു.പി സ്‌കൂളിലെ പുതിയ മന്ദിരം നാടിന് സമർപ്പിക്കുകയായിരുന്നു മന്ത്രി. കല്ലറ ഗ്രാമപഞ്ചായത്തിലെ പരപ്പിൽ എൽ.പി സ്‌കൂളിലെ സ്‌കൂൾ മന്ദിരത്തിന്റെ നിർമ്മാണോദ്ഘാടനവും സ്‌കൂളിന്റെ പ്ലാറ്റിനം ജൂബിലി ആഘോഷവും മന്ത്രി നിർവഹിച്ചു. കല്ലറ കുറുമ്പയം എൽ.പി സ്‌കൂളിലെ ബഹുനില മന്ദിരത്തിന്റെ ശിലാസ്ഥാപനവും മന്ത്രി നിർവഹിച്ചു. മണ്ഡലത്തിലെ പത്ത് ഹയർ സെക്കക്കൻഡറി സ്കൂളുകൾക്കായി പ്രത്യേക വികസന ഫണ്ട് ഉപയോഗിച്ചാണ് ലാബുകൾ സജ്ജീകരിച്ചത്. കിച്ചൺ-ഡൈനിംഗ് ഹാളുകൾക്കായി 95 ലക്ഷം രൂപ വിനിയോഗിക്കും. സ്കൂൾ പാഠ്യപദ്ധതി പരിഷ്കരണവുമായി ബന്ധപ്പെട്ട നിർദേശങ്ങളും അഭിപ്രായങ്ങളും സ്കൂൾ കുട്ടികളിൽ നിന്ന് സ്വീകരിക്കുന്നതിനുള്ള ചർച്ചയുടെ സംസ്ഥാനതല ഉദ്ഘാടനവും മന്ത്രി നിർവഹിച്ചു. പെരിങ്ങമ്മല ഗ്രാമപഞ്ചായത്തിലെ ജവഹർ കോളനി ഹൈസ്കൂളിൽ ബഹുനില കെട്ടിട നിർമ്മാണത്തിന്റെ പ്രവർത്തനങ്ങൾക്കും തുടക്കമായി.നന്ദിയോട് ഗ്രാമപഞ്ചായത്തിലെ പാലോട് എൽ.പി സ്‌കൂളിൽ സ്റ്റാർസ് പദ്ധതിയിലൂടെ അനുവദിച്ച 10 ലക്ഷം രൂപ ഉപയോഗിച്ച് നവീകരിച്ച പ്രീപ്രൈമറി വിഭാഗവും കുട്ടികളുടെ പാർക്കും മന്ത്രി നാടിന് സമർപ്പിച്ചു. പരിപാടികൾക്ക് ഡി.കെ. മുരളി എം.എൽ.എ അദ്ധ്യക്ഷത വഹിച്ചു.എ. എ. റഹീം എം.പി, ത്രിതല പഞ്ചായത്ത് പ്രതിനിധികൾ, രാഷ്ട്രീയ സാമൂഹിക രംഗത്തെ പ്രമുഖർ തുടങ്ങിയവരും പരിപാടികളിൽ പങ്കെടുത്തു.