തിരുവനന്തപുരം: കമലേശ്വരം സ്‌കൂളിന് മുന്നിൽ വിദ്യാർത്ഥികൾ തമ്മിലുണ്ടായ തർക്കത്തിലും ഏറ്റുമുട്ടലിലും ഒരു യുവാവിന് പരിക്കേറ്റു. സംഭവത്തിൽ പോക്സോ കേസ് പ്രതിയുൾപ്പെടെ രണ്ടുപേരെ ഫോർട്ട് പൊലീസ് കസ്റ്റഡിയിലെടുത്തു. പൂന്തുറ പള്ളിത്തെരുവ് സ്വദേശി അഫ്സലിന്റെ (19) കാലി​നാണ് ഗുരുതരമായി വെട്ടേറ്റത്.

കരിമഠം കോളനി സ്വദേശികളായ വി​ച്ചു എന്ന സൂര്യ (19),അപ്പൂസ് എന്ന സുധീഷ് (19) എന്നി​വരെ പൊലീസ് അറസ്റ്റുചെയ്‌തു. ഇതി​ൽ സുധീഷിന്റെ പേരി​ൽ പോക്സോ കേസുണ്ട്. ആക്രമണത്തിന്റെ സി.സി ടിവി ദൃശ്യങ്ങൾ പ്രചരിച്ചതോടെയാണ് സംഭവം പുറത്തായത്. ബുധനാഴ്ച വൈകിട്ടായതോടെ കമലേശ്വരം എച്ച്.എസ്.എസി​നു സമീപം ഒരു സംഘം അഫ്സലിനെ ആക്രമിക്കുകയായിരുന്നു. അഫ്സലിന്റെ കാലിന് ഗുരുതര പരിക്കുണ്ട്. ബൈക്കിൽ രണ്ട് പൊലീസുകാർ വന്നപ്പോൾ അക്രമികൾ ഓടി രക്ഷപ്പെടുകയായിരുന്നു.

അഫ്സലിനെ തടഞ്ഞുനിറുത്തുന്ന അക്രമിസംഘം കാലിൽ വെട്ടുന്ന ദൃശ്യങ്ങളാണ് പുറത്തുവന്നത്. രണ്ടുദി​വസം മുമ്പ് കമലേശ്വരം ഭാഗത്തുവച്ച് മുഖ്യപ്രതി​ കരിമഠം സ്വദേശി അശ്വി​ന്റെ സഹോദരന്റെ ബൈക്ക് തട്ടി​യതുമായി​ ബന്ധപ്പെട്ട് ഇരുഭാഗവും തമ്മിൽ തർക്കമുണ്ടായി​രുന്നു. തുടർന്ന് മൊബൈലിലൂടെ ഇരുസംഘവും ഏറ്റുമുട്ടലിനുള്ള വെല്ലുവിളി ഉയർത്തി. കമലേശ്വരം സ്‌കൂളിന് മുന്നിലെത്താനായിരുന്നു ആഹ്വാനം. ഇവിടെ സംഘടിച്ചെത്തിയവരാണ് ഏറ്റുമുട്ടിയത്. ഇരുവിഭാഗത്തിനും അക്രമത്തിൽ മർദ്ദനമേറ്റു.പ്രായപൂർത്തിയാകാത്ത രണ്ടുപേർ ഉൾപ്പെടെ ആറുപേരെ ഇനിയും പിടികൂടാനുണ്ട്. പരി​ക്കേറ്റ അഫ്സൽ ശസ്ത്രക്രി​യയ്‌ക്കുശേഷം മെഡി​ക്കൽ കോളേജ് ആശുപത്രി​ ഐ.സി​.യുവി​ലാണ്. മറ്റുള്ള പ്രതി​കൾക്കായി തെരച്ചിൽ ഊർജി​തമാക്കി​യെന്ന്​ ഫോർട്ട് പൊലീസ് അറി​യി​ച്ചു.