തിരുവനന്തപുരം: നഗരസഭയിലെ പ്രതിഷേധ സമരത്തിനിടെ മാദ്ധ്യമങ്ങളിലൂടെ മഹിളാ കോൺഗ്രസ് അദ്ധ്യക്ഷ ജെബി മേത്തർ എം.പി നടത്തിയ പരാമർശത്തിനെതിരെ മേയർ ആര്യാ രാജേന്ദ്രൻ വക്കീൽ നോട്ടീസ് അയച്ചു.

നോട്ടീസ് ലഭിച്ച് ഏഴ് ദിവസത്തിനകം രേഖാമൂലവും മാദ്ധ്യമങ്ങളിലൂടെയും പരാമർശം പിൻവലിച്ച് മാപ്പ് പറയണമെന്നും അല്ലാത്ത പക്ഷം സിവിലായും ക്രിമിനലായും നിയമ നടപടി സ്വീകരിക്കുമെന്നും നോട്ടീസിൽ പറയുന്നു. മുതിർന്ന അഭിഭാഷകൻ അഡ്വ. മുരുക്കുംപുഴ ആർ. വിജയകുമാരൻ നായർ മുഖേനയാണ് നോട്ടീസ് അയച്ചത്.

ജെബി മേത്തറിന്റെ പരാമർശത്തിനെതിരെ നിയമനടപടി സ്വീകരിക്കുമെന്ന് മേയർ നേരത്തെ വ്യക്തമാക്കിയിരുന്നു. മേയറുടെ രാജി ആവശ്യപ്പെട്ടുള്ള മഹിളാ കോൺഗ്രസ് പ്രതിഷേധത്തിനിടെയാണ് ' കട്ട പണവുമായി മേയറൂട്ടി കോഴിക്കോട്ടേക്ക് വിട്ടോ' എന്ന പോസ്റ്റർ ഒട്ടിച്ച പെട്ടിയുമായി എം.പി എത്തിയത്. ഭർത്താവിന്റെ വീട് സുരക്ഷിതമാണെന്നാണ് താൻ ഉദ്ദേശിച്ചതെന്ന് വിവാദത്തിൽ ജെബി മേത്ത‌ർ വിശദീകരണമായി പറഞ്ഞിരുന്നത്.