 മാസത്തിൽ രണ്ടുതവണ കുട്ടികൾക്ക് മന്ത്രി വീണാ ജോർജുമായി സംവദിക്കാം

തിരുവനന്തപുരം: 'ഞങ്ങൾക്ക് ഏറ്റവും ഇഷ്ടമുള്ള കാര്യം എന്താണെന്നറിയാമോ?' കുട്ടികളുടെ പ്രസിഡന്റായ നന്മയുടെ ചോദ്യം കേട്ട് മന്ത്രി വീണാ ജോർജ് ചോദിച്ചു 'എന്താ?.

''ഞങ്ങൾ പറയുന്നത് കേൾക്കാൻ മുതിർന്നവർ സമയം കണ്ടെത്തുന്നതാണ് കുട്ടികൾക്ക് ഏറ്റവും പ്രിയപ്പെട്ടത്' നന്മയുടെ ഉത്തരം കേട്ടതോടെ മുഴുവൻ കുരുന്നുകളുടെയും വാക്കുകൾക്ക് കാതോർക്കാൻ സമയം കണ്ടെത്താമെന്ന് മന്ത്രി ഉറപ്പ് നൽകി.

ശിശുക്ഷേമ സമിതിയുടെ ആഭിമുഖ്യത്തിൽ നിശാഗന്ധി ഓഡിറ്റോറിയത്തിൽ നടന്ന ശിശുദിനാഘോഷത്തിലാണ് നന്മ പരോക്ഷമായി കുട്ടികളുടെ പ്രശ്നം അവതരിപ്പിച്ചത്. ഇതിന് ഉടനടി മന്ത്രി പരിഹാരവും കണ്ടു. മാസത്തിൽ രണ്ടു തവണ കുട്ടികൾക്ക് മന്ത്രിയോട് സംസാരിക്കാൻ അവസരം ലഭിക്കും. കുട്ടികളുടെ പ്രയാസങ്ങൾ,പരാതികൾ,ആശയങ്ങൾ തുടങ്ങിയവയെല്ലാം പങ്കുവയ്ക്കാം. 15 ദിവസത്തിലൊരിക്കൽ എന്ന രീതിയിലാണ് കുട്ടികൾക്ക് മന്ത്രിയോട് സംസാരിക്കാൻ അവസരം ലഭിക്കുക.

ലഹരി ഉപഭോഗം,അന്ധവിശ്വാസം,അനാചാരം എന്നിവ തുടച്ചുനീക്കി ശാസ്ത്രബോധവും യുക്തിചിന്തയും വളർത്തുന്നതിനുള്ള നീക്കങ്ങളാണ് കുട്ടികളുടെ വികസനത്തിന് അനിവാര്യമെന്നതായിരുന്നു കുട്ടികളുടെ പ്രസംഗത്തിന്റെ ചുരുക്കം.

ജില്ലാ ശിശുക്ഷേമ സമിതി സെക്രട്ടറി കെ.ജയപാൽ മുഖ്യമന്ത്രിയുടെ കുട്ടികൾക്കുള്ള സന്ദേശം വേദിയിൽ വായിച്ചു. 'കൈകോർക്കാം ലഹരിക്കെതിരെ' എന്ന സന്ദേശത്തോടെ പുറത്തിറക്കിയ ശിശുദിന സ്റ്റാമ്പ് മന്ത്രി വീണാ ജോർജ് പ്രകാശനം ചെയ്തു. സ്റ്റാമ്പ് രൂപകല്പന ചെയ്ത ബാലരാമപുരം നസ്രേത്ത്‌ഹോം സ്‌കൂളിലെ അക്ഷയ്.ബി.എ,വിഷയം തിരഞ്ഞെടുത്ത കണ്ണൂർ അണ്ടല്ലൂർ സീനിയർ സ്‌കൂളിലെ അശ്വിൻ കൃഷ്ണ എന്നിവരെ മന്ത്രി വേദിയിൽ അനുമോദിച്ചു.

കുട്ടികളുടെ പ്രധാനമന്ത്രി കവടിയാർ ക്രൈസ്റ്റ് നഗർ സ്‌കൂൾ വിദ്യാർത്ഥിനി മിന്ന രഞ്ജിത്,കുട്ടികളുടെ പ്രസിഡന്റ് വഞ്ചിയൂർ ഹോളി ഏഞ്ചൽസിലെ നന്മ.എസ്,കുട്ടികളുടെ സ്പീക്കർ കോട്ടൺഹിൽ ഗേൾസ് എച്ച്.എസ്.എസിലെ ഉമ. എസ്, സമ്മേളനത്തിന് സ്വാഗതമാശംസിച്ച ശിശുവിഹാർ യു.പി സ്‌കൂളിലെ പാർവണേന്ദു.പി.എസ്, നന്ദി പറഞ്ഞ കാർമൽ ഗേൾസ് എച്ച്.എസ്.എസിലെ ഗൗതമി.എസ്,സ്വാഗത ഗാനമാലപിച്ച ദേവനന്ദൻ,കുട്ടികളുടെ പരിശീലകൻ പള്ളിപ്പുറം ജയകുമാർ എന്നിവരെയും മന്ത്രി അനുമോദിച്ചു. ശിശുദിനത്തിന്റെ ഭാഗമായി സംഘടിപ്പിച്ച സ്‌നേഹോത്സവത്തിൽ മികച്ച പ്രകടനം കാഴ്ചവച്ച വിദ്യാർത്ഥികളെയും സ്‌കൂളുകളെയും അനുമോദിച്ചു.ശിശുദിന റാലിയിൽ മികച്ച പ്രകടനം കാഴ്ചവച്ച വെള്ളായണി ലിറ്റിൽ ഫ്ളവർ കോൺവെന്റ് സ്‌കൂളിലെ വിദ്യാർത്ഥികളെയും അനുമോദിച്ചു. വി.കെ. പ്രശാന്ത് എം.എൽ.എ അദ്ധ്യക്ഷതവഹിച്ചു.ബാലാവകാശ കമ്മിഷൻ ചെയർമാൻ കെ.വി. മനോജ് കുമാർ പങ്കെടുത്തു.