നെയ്യാറ്റിൻകര: നെയ്യാറ്റിൻകര നഗരസഭയുടെ നേതൃത്വത്തിൽ ശിശുദിനാഘോഷം വിപുലമായി ആഘോഷിച്ചു. അഞ്ച് ദിവസങ്ങളിലായി നഗര പ്രദേശത്തെ സ്കൂളുകളിലെ കുട്ടികളുടെ പങ്കാളിത്തത്തോടെ കലാകായിക മത്സരങ്ങൾ നടന്നു. വിവിധ സ്ക്കൂളുകളിൽ നിന്നായി ശിശുദിന റാലിയിൽ 2500 കുട്ടികൾ പങ്കെടുത്തു. റാലി എസ്.എൻ ഓഡിറ്റോറിയത്തിൽ നിന്ന് നഗരം ചുറ്റി നെയ്യാറ്റിൻകര ഗവ.ഹയർ സെക്കൻഡറി സ്കൂളിൽ സമാപിച്ചു.

നെയ്യാറ്റിൻകര ഗവ. ഹയർ സെക്കൻഡറി സ്കൂളിൽ നടന്ന സമാപനചടങ്ങിൽ കുട്ടികളുടെ പ്രധാനമന്ത്രിയായി തിരഞ്ഞെടുത്ത മാസ്റ്റർ ജി.എസ്.വിനായക് അദ്ധ്യക്ഷനായി. കെ.ആൻസലൻ എം.എൽ.എ ഉദ്ഘാടനം ചെയ്തു. നഗരസഭ വിദ്യാഭ്യാസ കലാകായിക സ്റ്റാൻഡിംഗ് കമ്മിറ്റി ചെയർമാൻ ഡോ.എം.എ.സാദത്ത് സ്വാഗതം പറഞ്ഞു. മുൻസിപ്പൽ സെക്രട്ടറി മണികണ്ഠൻ.ആർ റിപ്പോർട്ട് അവതരിപ്പിച്ചു.നഗരസഭ ചെയർമാൻ പി.കെ.രാജമോഹനൻ ശിശുദിന സന്ദേശം നൽകി. വൈസ് ചെയർപേഴ്സൺ പ്രിയ സുരേഷ്,നഗരസഭ സ്ഥിരം സമിതി അംഗങ്ങളായ കെ.കെ.ഷിബു,എൻ.കെ.അനിതകുമാരി,ജെ.ജോസ് ഫ്രാങ്ക്ളിൻ,ആർ.അജിത, കൗൺസിലർമാരായ എം.ഷിബുരാജ് കൃഷ്ണ, മഞ്ചന്തല സുരേഷ്, സ്പോർട്സ് കമ്മിറ്റി ചെയർമാൻ ജി.എൻ.ശ്രീകുമാരൻ എന്നിവർ സംസാരിച്ചു. നഗരസഭ സൂപ്രണ്ട് എ.ശ്രീകുമാരൻ നന്ദി പറഞ്ഞു. ശിശുദിന റാലിക്ക് ഗവ.എച്ച്.എസ് വിഭാഗത്തിൽ ഒന്നാം സമ്മാനം ഗവ.ബോയ്സ് ഹയർ സെക്കൻഡറി സ്കൂളിന് ലഭിച്ചു. തുടർന്ന് കലാകായിക മത്സര വിജയികൾക്കുള്ള സമ്മാനദാനവും, അനുമോദനവും, എവർറോളിംഗ് ട്രോഫിയും നൽകി.