കിളിമാനൂർ: കാത്തിരിപ്പിന് വിരാമം ഭാഗ്യവാന് സമ്മാന തുക നൽകി ധനകാര്യ വകുപ്പ്. സംസ്ഥാന ചരക്ക് സേവന നികുതി വകുപ്പിന്റെ ലക്കി ബിൽ ആപ്പിന്റെ ആദ്യ പ്രതിമാസ നറുക്കെടുപ്പ് വിജയി സുനിൽ കുമാറിന്റെ അക്കൗണ്ടിലാണ് കഴിഞ്ഞ ദിവസം സമ്മാന തുക നികുതി എല്ലാം കഴിഞ്ഞ് ഏഴ് ലക്ഷം രൂപ എത്തിയത്.

കിളിമാനൂർ പുതിയകാവ് ചിത്തിരയിൽ സുനിൽ കുമാറാണ് സമ്മാനത്തുകയായ പത്ത് ലക്ഷം രൂപയ്ക്ക് വേണ്ടി ജി.എസ്.ടി വകുപ്പിന്റെ ഓഫീസിൽ കയറിയിറങ്ങിയത്. ഇതിനെ തുടർന്ന് കേരള കൗമുദി ശനിയാഴ്ച " ഭാഗ്യം സുനിൽ കുമാറിനെ തുണച്ചപ്പോൾ ഖജനാവ് കാലി" എന്ന തലക്കെട്ടിൽ വാർത്ത നൽകിയിരുന്നു. തുടർന്ന് കഴിഞ്ഞ ദിവസം തന്നെ സമ്മാന തുക ലഭിച്ചു.

തിരുവനന്തപുരം നഗരത്തിലെ ഒരു പ്രമുഖ ടെക്സ്റ്റയിൽസിൽ നിന്ന് സുനിൽ കുമാർ വസ്ത്രങ്ങൾ വാങ്ങിയിരുന്നു. സെപ്തംബർ ആറിനാണ് പ്രൈസ് അടിച്ചതായി ലക്കി ബിൽ ആപ്ലിക്കേഷനിൽ നോട്ടിഫിക്കേഷൻ വന്നത്. പിറ്റേ ദിവസത്തെ പത്രങ്ങളിൽ സർക്കാർ പരസ്യവും നൽകി. എന്നാൽ ജി.എസ്.ടി ഓഫീസിൽ ചെന്നപ്പോൾ സാമ്പത്തിക പ്രതിസന്ധി പറഞ്ഞ് സുനിൽകുമാറിനെ മടക്കി അയയ്ക്കുകയായിരുന്നു.