വെള്ളറട: അമ്പൂരി കുമ്പിച്ചൽ കടവിൽ കരിപ്പയാറിന് കുറുകെ നിർമ്മിക്കുന്ന പാലത്തിന്റെ പൈലിംഗ് പ്രവർത്തനം പുരോഗമിക്കുന്നു. കിഫ്ബി ഫണ്ടിൽ നിന്നും 19 കോടി രൂപ ചെലവിലാണ് നിർമ്മാണം. 36.25 മീറ്റർ വീതം അകലത്തിൽ 7 സ്പാനുകളിലായി 253.4 മീറ്റർ നീളത്തിലാണ് പാലം. എട്ട് ലൊക്കേഷനുകളിലായി ആറ് പൈലുകൾ വീതം 48 പൈലുകളാണ് ചെയ്യുന്നത്, ഫ്ലോട്ടിംഗ് ബാർജിന്റെ സഹായത്തോടുകൂടിയാണ് 15 മീറ്ററിലധികം വെള്ളമുള്ള ജലാശയത്തിലെ പൈലിംഗ് നടത്തുന്നത്. 11 മീറ്റർ വീതിയുള്ള പാലത്തിൽ റോഡിനിരുവശവും 8 മീറ്റർ വീതിയിൽ നിർമ്മിക്കുന്ന ഫുട്പാത്തും അപ്രോച്ച് റോഡിന് പുറമേ കടവിലേക്ക് ഇറങ്ങുന്നതിനായി ഇരുവശങ്ങളിലും 4 മീറ്റർ വീതിയിൽ സർവീസ് റോഡും നിർമ്മിക്കും. കരിപ്പയാറിന്റെ മറുകരയിലെ പതിനൊന്നോളം ആദിവാസി ഊരുകളിൽ താമസിക്കുന്ന ആയിരത്തിലധികം കുടുംബങ്ങളുടെയും അമ്പൂരി നിവാസികളുടെയും ഏറെക്കാലത്തെ ആവശ്യമാണ് കുമ്പിച്ചൽ കടവ് പാലം. ഇത് പൂർത്തിയാകുന്നതോടെ ആദിവാസി ഊരുകളിൽ കഴിയുന്നവർക്കും വിദ്യാർത്ഥികൾക്കും റോഡ് ഗതാഗതത്തിന് സൗകര്യമാകും.