നെടുമങ്ങാട്:നെടുമങ്ങാട് ടൗൺ​ ഹാളിൽ നടന്ന കളക്ടറോടൊപ്പം പരാതി പരിഹാര അദാലത്തിന് കളക്ടർ ജെറോമിക് ജോർജ് നേതൃത്വം നൽകി.താലൂക്ക് പരിധിയിലെ വിവിധ സർക്കാർ ഓഫീസുകളുമായി ബന്ധപ്പെട്ട് ലഭിച്ച 238 പരാതികളിൽ 90 എണ്ണം തീർപ്പാക്കി. 35 പേർക്ക് ഭൂമി തരം മാറ്റൽ സംബന്ധിച്ച ഉത്തരവും 15 മുതിർന്ന പൗരന്മാർക്ക് മെയിന്റനൻസ് ഉത്തരവും 24പേർക്ക് ജനന-മരണ സർട്ടിഫിക്കറ്റും മൂന്ന് പേർക്ക് ലിമിറ്റഡ് ഗാർഡിയൻഷിപ്പ് സർട്ടിഫിക്കറ്റും 10പേർക്ക് ന്യായവില ഉത്തരവും വിതരണം ചെയ്തു. റവന്യൂ വകുപ്പുമായി ബന്ധപ്പെട്ട് 58 അപേക്ഷകളും മറ്റുവകുപ്പുകളുടെ 32അപേക്ഷകളും തീർപ്പാക്കി. ബാക്കിയുളള പരാതികളിൽ പട്ടയവുമായി ബന്ധപ്പെട്ട അപേക്ഷകൾ,റീസർവ്വേ,അതിർത്തി- വഴി തർക്കം,അനധികൃത കൈയേറ്റം,ലൈഫ് ഭവന പദ്ധതി,ആർ.ടി.ഒ,മുനിസിപ്പാലിറ്റി,പഞ്ചായത്ത് തുടങ്ങിയവ ബന്ധപ്പെട്ട വിഭാഗങ്ങളിലേക്ക് തുടർ നടപടികൾക്കായി കൈമാറിയതായി കളക്ടർ അറിയിച്ചു. നെടുമങ്ങാട് ആർ.ടി.ഒ ജയകുമാർ.കെ.പി,തഹസിൽദാർ ജെ.അനിൽ കുമാർ,വിവിധ വകുപ്പുകളിലെ ഉദ്യോഗസ്ഥർ,ജനപ്രതിനിധികൾ തുടങ്ങിയവർ പങ്കെടുത്തു.