അമ്പലപ്പുഴ: അമ്പലപ്പുഴ അർബൻ ഹെൽത്ത് ട്രയ്നിംഗ് സെന്ററിന്റെ വികസനത്തിന് 20 കോടി രൂപ അനുവദിച്ചതായി എച്ച്. സലാം എം .എൽ. എ പറഞ്ഞു. ഇവിടെ ആരംഭിച്ച സായാഹ്ന ഒ .പി യുടെ ഉദ്ഘാടനം ചെയ്യുകയായിരുന്നു അദ്ദേഹം. ഉച്ചയ്ക്ക് 2 മുതൽ രാത്രി 8 വരെയാണ് സായാഹ്ന ഒ .പി യുടെ പ്രവർത്തനം. ഒരു ഡോക്ടർ, ഒരു ഫാർമസിസ്റ്റ്‌, ഒരു സ്റ്റാഫ്നേഴ്സ്, ഒരു ഗ്രേഡ്-2 അറ്റന്റർ എന്നിവരുടെ സേവനം ഈ സമയത്തുണ്ടാകും. നിത്യേന രാവിലെ 8 മുതൽ ഉച്ചയ്ക്ക് 1 വരെ 4 ഡോക്ടർമാർ, 10 ഓളം ഹൗസ് സർജന്മാർ, ഒരു സ്റ്റാഫ്നേഴ്സ്, ഒരു എം. എസ്. സി വിദ്യാർത്ഥി, ഒരു ഗ്രേഡ്-2 അറ്റന്റർ, ശുചീകരണ ജീവനക്കാർ എന്നിവരുടെ സേവനങ്ങൾക്ക് പുറമെയാണ് ഇപ്പോൾ സായാഹ്ന ഒ.പി യും ആരംഭിച്ചത്. വ്യാഴാഴ്ചകളിൽ പ്രവർത്തിക്കുന്ന ജീവിത ശൈലീ രോഗ ക്ലിനിക്, ബ്ലോക്ക്, അമ്പലപ്പുഴ തെക്ക് പഞ്ചായത്തുകളിലായി 2 പാലിയേറ്റീവ് കെയർ, തിങ്കൾ, ബുധൻ, വെള്ളി ദിവസങ്ങളിൽ ഉച്ചക്കു ശേഷം പ്രവർത്തിക്കുന്ന ഫിസിയോ തെറാപ്പി ഒ. പി, ആശുപത്രിക്കു കീഴിലെ 4 സബ് സെന്ററുകളിൽ ചൊവ്വാഴ്ചകളിൽ ഗർഭിണികൾക്കുള്ള ക്ലിനിക് എന്ന വിധമാണ് പ്രവർത്തനം. ആശുപത്രി അങ്കണത്തിൽ ചേർന്ന സമ്മേളനത്തിൽ ബ്ലോക്ക് പഞ്ചായത്ത് പ്രസിഡന്റ് അഡ്വ.ഷീബാ രാകേഷ് അദ്ധ്യക്ഷയായി. അമ്പലപ്പുഴ തെക്ക് പഞ്ചായത്ത് പ്രസിഡന്റ് കെ. കവിത, ബ്ലോക്ക് പഞ്ചായത്ത് സ്റ്റാന്റിംഗ് കമ്മിറ്റി അദ്ധ്യക്ഷ ശ്രീജ രതീഷ്, അംഗങ്ങളായ ജി. വേണു ലാൽ, ശ്രീജ സുഭാഷ്, അഡ്വ.പ്രദീപ്തി സജിത്ത്, ആർ. ഉണ്ണി, പഞ്ചായത്തംഗം മനോജ് കുമാർ, മെഡിക്കൽ ഓഫീസർ ഡോ. ലക്ഷ്മി മോഹൻ, ഡോ.സുധിരാജ് എന്നിവർ സംസാരിച്ചു. എ. എം .ഒ ഡോ. വി .ജി. അനുപമ സ്വാഗതം പറഞ്ഞു.