അമ്പലപ്പുഴ: പുന്നപ്ര പൊലീസ് സ്റ്റേഷൻ അതിർത്തിയിൽ നിരീക്ഷണ കാമറകൾ സ്ഥാപിക്കുന്ന കാവൽ നേത്രം പദ്ധതി ഉദ്ഘാടനം ഇന്നു വൈകിട്ട് 5ന് പുന്നപ്ര സ്റ്റേഷൻ അങ്കണത്തിൽ നടക്കും. എച്ച്. സലാം എം.എൽ.എ ഉദ്ഘാടനവും സ്വിച്ച് ഓൺ കർമ്മവും നിർവഹിക്കും. കാവൽ കാവൽ നേത്രം പ്രോജക്ട് ചെയർമാൻ ഫാ. കരിപ്പിങ്ങാപ്പുറം അദ്ധ്യക്ഷനാകും.

ജില്ലാ പൊലീസ് മേധാവി ചൈത്ര തെരേസ ജോൺ മുഖ്യാതിഥിയാവും. അഡീഷണൽ എസ്.പി എസ്.ടി സുരേഷ് കുമാർ, അമ്പലപ്പുഴ ഡിവൈ.എസ്.പി ബിജു വി.യർ, ബ്ലോക്ക് പഞ്ചായത്ത് പ്രസിഡന്റ് അഡ്വ. ഷീബ രാജേഷ്, പഞ്ചായത്ത് പ്രസിഡന്റുമാരായ പി.ജി. സൈറസ്, സജിത സതീശൻ, എസ്. ഹാരിസ്, ജില്ലാ പഞ്ചായത്ത് മെമ്പർ ഗീത ബാബു, ബ്ലോക്ക് പഞ്ചായത്ത് മെമ്പർ എം. ഷീജ, ഗ്രാമപഞ്ചായത്തംഗം പി.പി. ആന്റണി, കേബിൾ ടി.വി ഓപ്പറേറ്റേഴ്സ് അസോസിയേഷൻ ജില്ലാ സെക്രട്ടറി എസ്. ഷിബു തുടങ്ങിയവർ സംസാരിക്കും. പുന്നപ്ര എസ്.എച്ച്.ഒ ലൈസാദ് മുഹമ്മദ് സ്വാഗതവും എസ്.ഐ സെസിൽ ക്രിസ്റ്റ്യൻ രാജ് നന്ദിയും പറയും.

കുറ്റകൃത്യങ്ങളും സാമൂഹ്യവിരുദ്ധ പ്രവർത്തനങ്ങളും തടയാൻ പുന്നപ്ര പൊലീസ് സ്റ്റേഷൻ പരിധിയിലുള്ള വിവിധ സ്ഥലങ്ങളിൽ സി.സി ടി.വി കാമറകൾ സ്ഥാപിക്കാനാണ് കാവൽ നേത്രം ആരംഭിക്കുന്നത്. ആദ്യഘട്ടമെന്നോണം 32 കാമറകളാണ് സ്ഥാപിച്ചത്. വിവിധ സ്ഥാപനങ്ങളുടെയും സ്വകാര്യ വ്യക്തികളുടെയും സഹായത്തോടെയും സ്വകാര്യ കേബിൾ ഓപ്പറേറ്റർമാരുടെ സഹകരണത്തോടെയുമാണ് കാമറകൾ സ്ഥാപിക്കുന്നത്. പുന്നപ്ര പൊലീസ് സ്റ്റേഷനിലാണ് കൺട്രോൾ റൂം.