മാന്നാർ: വിദ്യാഭ്യാസം, മൗലിക അവകാശമായിരിക്കെ,ന്യൂനപക്ഷ സ്‌കോളർഷിപ്പുകൾ നിർത്തലാക്കുന്ന നടപടി പുനപരിശോധിക്കണമെന്ന് മലങ്കര അസോസിയേഷൻ സെക്രട്ടറി അഡ്വ.ബിജു ഉമ്മൻ ആവശ്യപ്പെട്ടു. . നിശ്ചിത വരുമാനത്തിൽ താഴെയുള്ള എട്ടാം ക്ലാസ് വരെയുള്ള ന്യൂനപക്ഷ വിദ്യാർത്ഥികൾക്ക് നൽകിയിരുന്ന പ്രീമെട്രിക് സ്‌കോളർഷിപ്പും ന്യൂനപക്ഷ വിഭാഗത്തിലെ വിദ്യാർത്ഥികൾക്ക് ഉന്നതപഠനത്തിന് അനുവദിച്ചിരുന്ന മൗലാനാ ആസാദ് നാഷണൽ ഫെലോഷിപ്പും നിറുത്തലാക്കാനുള്ള തീരുമാനം നിരാശാജനകമാണ്. യു.ജി.സി ജെ.ആർ.എഫ് ഫെലോഷിപ്പ് ലഭ്യമല്ലാത്ത വിദ്യാർത്ഥികൾക്ക് ആശ്വാസമായിരുന്ന എം.എ.എൻ.എഫ് നിറുത്തലാക്കിയാൽ ഗവേഷണ പഠനം നടത്തുന്ന ന്യൂനപക്ഷ വിദ്യാർത്ഥികൾ പ്രതിസന്ധിയിലാകും. ഈ സാഹചര്യത്തിൽ, ന്യൂനപക്ഷ വിദ്യാർത്ഥികൾക്കുള്ള സ്‌കോളർഷിപ്പുകൾ നിർത്തലാക്കാനുള്ള തീരുമാനത്തിൽ നിന്ന് കേന്ദ്രസർക്കാർ പിന്മാറണമെന്നും അഡ്വ.ബിജു ഉമ്മൻ ആവശ്യപ്പെട്ടു.