മുഹമ്മ : ആലപ്പുഴയിൽ നടന്ന സംസ്ഥാന പവർ ലിഫ്ടിംഗ് ബെഞ്ച് പ്രസ് മത്സരത്തിൽ മുഹമ്മ എ.ബി വിലാസം സ്‌കൂളിന് സ്വർണ മെഡൽ തിളക്കം. സബ് ജൂനിയർ വിഭാഗത്തിൽ മത്സരിച്ച മൂന്ന് വിദ്യാർഥിനികളാണ് സ്‌കൂളിന്റെ അഭിമാനം ഉയർത്തിയത്. ദേശീയ, അന്തർദ്ദേശീയ താരങ്ങളടക്കം മാറ്റുരച്ച മത്സരത്തിലാണ് സ്‌കൂളിന്റെ നേട്ടം. പത്താം ക്ലാസ് വിദ്യാർത്ഥിനി എം.ആർ.ആശംസ ഏഷ്യൻ ക്ലാസ്സിക് പവർ ലിഫ്റ്രിംഗ് മത്സരത്തിൽ സ്വർണം നേടിയതിനു പിന്നാലെയാണ് സ്കൂളിന്റെ ഇപ്പോഴത്തെ അഭിമാനനേട്ടം.

ആദ്യമായി സംസ്ഥാന മത്സരത്തിൽ പങ്കെടുത്ത പ്ലസ് വൺ സയൻസ് ബാച്ച് വിദ്യാർത്ഥിനി എസ്.ആർദ്ര 52 കിലോയിൽ സ്വർണം നേടി. മാരാരിക്കുളം വടക്ക് പഞ്ചായത്ത് പതിനാറാം വാർഡ് ചെറുവള്ളിശേരി മണങ്ങശേരി സുഖലാൽ - അനിത ദമ്പതികളുടെ മകളാണ്. 53 കിലോ വിഭാഗത്തിൽ പത്താം ക്ലാസ് വിദ്യാർഥിനി അഭിന ജോയ് സ്വർണം സ്വന്തമാക്കി. കഴിഞ്ഞ സംസ്ഥാന മത്സരത്തിൽ വെങ്കലം കരസ്ഥമാക്കിയ അഭിന ജോയ് ദേശീയ മത്സരത്തിലും മെഡൽ നേടിയിട്ടുണ്ട്. മുഹമ്മ ഏഴാം വാർഡ് തോട്ടുങ്കൽ ജോയിയുടെയും ദീപയുടെയും മകളാണ്.

പത്താം ക്ലാസ് വിദ്യാർത്ഥിനി ഡി.ആർച്ച 57 കിലോ വിഭാഗത്തിലും സ്വർണം നേടി സ്കൂളിന്റെ അഭിമാനം ഉയർത്തി. കഴിഞ്ഞ സംസ്ഥാന മത്സരത്തിൽ വെങ്കലം നേടിയിരുന്നു. മുഹമ്മ കൊല്ലംവെളി ധർമ്മജി - അമ്പിളി ദമ്പതികളുടെ മകളാണ്. കായികാദ്ധ്യാപകൻ വി.സവിനയന്റെ ശിക്ഷണത്തിൽ സ്‌കൂളിലെ എ.ബി വിലാസം ജിമ്മിലാണ് ഇവർ പരിശീലനം നേടുന്നത്.