മുഹമ്മ: ജില്ലാപഞ്ചായത്തും സംസ്ഥാന യുവജനക്ഷേമ ബോർഡും സംയുക്തമായി നാലു ദിവസമായി കലവൂരിൽ നടത്തിയ ജില്ല കേരളോത്സവത്തിൽ കലാ,കായിക മത്സരങ്ങളിൽ 280 പോയിന്റോടെ തൈക്കാട്ടുശേരി ബ്ലോക്ക് പഞ്ചായത്ത് ഓവറാൾ ചാമ്പ്യൻമാരായി. 268 പോയിന്റ് നേടിയ ആലപ്പുഴ നഗരസഭ രണ്ടാം സ്ഥാനവും 196 പോയിന്റോടെ ഭരണിക്കാവ് ബ്ലോക്ക് പഞ്ചായത്ത് മൂന്നാം സ്ഥാനവും നേടി.

സി.ശാന്തകുമാർ (തൈക്കാട്ടുശ്ശേരി ബ്ലോക്ക്), എസ് ആർ ശ്രീകാന്ത് ( ചേർത്തല മുനിസിപ്പാലിറ്റി ) എന്നിവർ കലാപ്രതിഭകളും ഗായത്രി എസ് നായർ (കഞ്ഞിക്കുഴി ബ്ലോക്ക്) കലാതിലകവുമായി. പി.ആകാശ് (കഞ്ഞിക്കുഴി ബ്ലോക്ക്), എസ് ആരതി (തൈക്കാട്ടുശേരി ബ്ലോക്ക്) എന്നിവരാണ് പുരുഷ, വനിതാ ഇനങ്ങളിലെ കായിക ചാമ്പ്യന്മാർ. ഏഷ്യൻ ക്ലാസ്സിക് പവർ ലി​ഫ്ടിംഗ് ചാമ്പ്യൻഷിപ്പിൽ സ്വർണ മെഡൽ നേടിയ മുഹമ്മ എ.ബി വിലാസം സ്‌കൂളിലെ പത്താം ക്ലാസ്സ് വിദ്യാർത്ഥിനി എം.ആർ.ആശംസയെ അനുമോദിച്ചു. സമാപന സമ്മേളനം ജില്ലാ പഞ്ചായത്ത് പ്രസിഡന്റ് കെ.ജി.രാജേശ്വരി ഉദ്ഘാടനം ചെയ്തു. ജില്ല പഞ്ചായത്ത് വൈസ് പ്രസിഡന്റ് ബിപിൻ സി.ബാബു അദ്ധ്യക്ഷനായി. സംസ്ഥാന യുവജന ക്ഷേമബോർഡ് ജില്ല കോഓർഡിനേറ്റർ ടി. ടി. ജിസ്‌മോൻ, പ്രോഗ്രാം ഓഫീസർ ബി.ഷീജ, തൈക്കാട്ടുശേരി ബ്ലോക്ക് പഞ്ചായത്ത് പ്രസിഡന്റ് പി.എം.പ്രമോദ് ,അമ്പലപ്പുഴ ബ്ലോക്ക് പഞ്ചായത്ത് പ്രസിഡന്റ് അഡ്വ. ഷീബ രാകേഷ്, ജില്ല പഞ്ചായത്ത് വികസനകാര്യ സ്റ്റാൻഡിംഗ് കമ്മറ്റി ചെയർപേഴ്സൺ എ .ശോഭ, അംഗം ആർ .റിയാസ്, സെക്രട്ടറി കെ .ആർ .ദേവദാസ് എന്നിവർ സംസാരിച്ചു.