കൊച്ചി: കേരളത്തിലെ നവോത്ഥാന മുന്നേറ്റം ഇപ്പോൾ ബഹുദൂരം പിന്നോട്ട് നടക്കുകയാണെന്ന് എസ്.എൻ.ഡി.പി. യോഗം ജനറൽ സെക്രട്ടറി വെള്ളാപ്പള്ളി നടേശൻ പറഞ്ഞു. ശിവഗിരി തീർത്ഥാടന നവതി ആഘോഷത്തോടനുബന്ധിച്ച് എസ്.എൻ.ഡി.പി യോഗം കണയന്നൂർ യൂണിയന്റെ നേതൃത്വത്തിൽ സംഘടിപ്പിച്ച തീർത്ഥാടന വിളംബര പദയാത്രയുടെ സമാപനസമ്മേളനം പൂത്തോട്ടയിൽ ഉദ്ഘാടനം ചെയ്യുകയായിരുന്നു അദ്ദേഹം.

ശ്രീനാരായണ ഗുരുദേവൻ, ചട്ടമ്പിസ്വാമി, മഹാത്മാ അയ്യങ്കാളി തുടങ്ങിയവർ ബഹുദൂരം മുന്നിലെത്തിച്ചതാണ് കേരളീയ സമൂഹത്തെ. ഇവരുടെ പരിശ്രമങ്ങൾ പാഴാകുന്ന കാര്യങ്ങളാണ് ദൃശ്യമാകുന്നത്. മദ്യവും മയക്കുമരുന്നും ഈ തലമുറയെ കീഴടക്കുന്നു. കുഞ്ഞുങ്ങളെയും മാതാപിതാക്കളെയും കൊലപ്പെടുത്താൻ പോലും ഇപ്പോൾ മടിയില്ല. കുടുംബ ബന്ധങ്ങളും ശിഥിലമാവുകയാണ്. അന്ധവിശ്വസങ്ങളും അനാചാരങ്ങളും പുന:സ്ഥാപിക്കുന്ന തിരക്കിലാണ് പലരും. മനുഷ്യക്കുരുതിയുടെ വാർത്തകൾ നമ്മെ നാണിപ്പിക്കുന്നു.

സംഘടിച്ച് ശക്തരാകാനും വിദ്യകൊണ്ട് പ്രബുദ്ധരാകാനും വ്യവസായവും കൃഷിയും കൊണ്ട് അഭിവൃദ്ധി നേടാനും ശിവഗിരി തീർത്ഥാടനത്തിലൂടെ ഗുരുദേവൻ മുന്നോട്ടുവച്ച ആശയങ്ങൾ നാം കൈവിടരുത്. ഈഴവരല്ലാതെ മറ്റാരെയും ശിവഗിരി തീർത്ഥാടനത്തിലേക്ക് എത്തിക്കാൻ കഴിയാത്തത് നമ്മുടെ പരാജയമാണ്. മതസൗഹാർദ്ദമെന്ന ചിന്ത നമുക്ക് മാത്രമേയുള്ളൂ. ഈ സമൂഹത്തിന് തുല്യനീതി ലഭിക്കണമെങ്കിൽ വോട്ടുബാങ്കായി മാറണം. അധികാര രാഷ്ട്രീയത്തിൽ ഈഴവ സമുദായത്തിന് പങ്കില്ലാതായി. പെൻഷനും കിറ്റും തൊഴിലുറപ്പും മാത്രമാണ് സമുദായത്തിന് ലഭിക്കുന്നതെന്നും വെള്ളാപ്പള്ളി പറഞ്ഞു.

യോഗത്തിൽ കണയന്നൂർ യൂണിയൻ ചെയർമാൻ മഹാരാജാ ശിവാനന്ദൻ അദ്ധ്യക്ഷത വഹിച്ചു. കൺവീനർ എം.ഡി. അഭിലാഷ് സ്വാഗതവും പൂത്തോട്ട ശാഖാ പ്രസിഡന്റ് ഇ.എൻ. മണിയപ്പൻ നന്ദിയും പറഞ്ഞു.

വൈസ് ചെയർമാൻ സി.വി. വിജയൻ, അഡ്മിനിസ്ട്രേറ്റീവ് കമ്മിറ്റിഅംഗങ്ങളായ എൽ.സന്തോഷ്, കെ.കെ. മാധവൻ, ടി.എം. വിജയകുമാർ, ടി.കെ. പദ്മനാഭൻ, കെ.പി. ശിവദാസ്, യൂത്ത് മൂവ്മെന്റ് പ്രസിഡന്റ് വിനോദ് വേണുഗോപാൽ, സെക്രട്ടറി ശ്രീജിത്ത് ശ്രീധർ, വനിതാസംഘം ചെയർപേഴ്സൺ ഭാമ പത്മനാഭൻ, കൺവീനർ വിദ്യാ സുധീഷ്, വൈദികയോഗം പ്രസിഡന്റ് ശ്രീകുമാർ ശാന്തി, സെക്രട്ടറി സനോജ് ശാന്തി, സൈബർസേനാ കൺവീനർ റെജി വേണുഗോപാൽ, എംപ്ളോയീസ് ഫോറം ജില്ലാ കമ്മിറ്റിഅംഗങ്ങളായ സുരേഷ് പൂത്തോട്ട, അജയകുമാർ തുടങ്ങിയവർ പങ്കെടുത്തു.

കണയന്നൂർ യൂണിയൻ ചെയർമാൻ മഹാരാജാ ശിവാനന്ദനും കൺവീനർ എം.ഡി. അഭിലാഷും നയിച്ച വിളംബര പദയാത്ര ബുധനാഴ്ച രാവിലെ വടുതല ശാഖയിൽ നിന്നാണ് തുടക്കം കുറിച്ചത്. ഇന്നലെ എരൂർ സൗത്ത് ശാഖയിൽ നിന്ന് പുനരാരംഭിച്ച യാത്ര വിവിധ കേന്ദ്രങ്ങളിൽ സ്വീകരണങ്ങൾഏറ്റുവാങ്ങി ഇന്നലെ ഏഴു മണിയോടെ തെക്കൻപറവൂരിൽ വലിയ ഘോഷയാത്രയോടെയാണ് സ്വീകരിച്ച് പൂത്തോട്ടയിലേക്ക് ആനയിച്ചത്.