ചേർത്തല: വി​ദേശത്തുള്ള സുഹൃത്തിന്റെ അച്ഛനമ്മമാരുടെ സംരക്ഷണത്തി​നായി​ അവരുടെ വീട്ടി​ൽ 20 വർഷത്തോളം നീണ്ട താമസത്തി​നി​ടെ പലപ്പോഴായി​ 20 പവനും 80,000 രൂപയും രൂപയും അപഹരി​ച്ച യുവാവ് പി​ടി​യി​ൽ. എസ്.എൽ പുരം പൂപ്പളളിക്കാവ് ശങ്കരമംഗലത്തി​ൽ മോഹൻദാസി​നും ഭാര്യ ആനന്ദവല്ലി​ക്കുമൊപ്പം താമസിച്ചിരുന്ന എറണാകുളം സ്വദേശിയായ മനോജി​നെയാണ് (36) ആനന്ദവല്ലി​യുടെ പരാതി​യെത്തുടർന്ന് മാരാരിക്കുളം പൊലീസ് പിടികൂടിയത്.

പൊലീസ് പറയുന്നത്: സിനിമ ഷൂട്ടിംഗ് സെ​റ്റിൽ പാചകക്കാരനായി​രുന്ന മനോജുമായി മോഹൻദാസി​ന്റെ മകൻ സൗഹൃദത്തിലായി. ഇയാളും സി​നി​മാരംഗത്തായി​രുന്നു അപ്പോൾ. ബ്രിട്ടനിലേക്ക് പോകാൻ അവസരം ലഭി​ച്ചപ്പോൾ വീട്ടിൽ അച്ഛനെയും അമ്മയെയും നോക്കാനായി​ മനോജി​നെ ക്ഷണി​ച്ചു. അന്ന് 16 വയസായി​രുന്നു മനോജി​ന്. സന്തോഷത്തോടെ ജോലി​ ഏറ്റെടുത്ത ഇയാൾ യുവാവി​ന്റെ വീട്ടിൽ താമസിച്ച് ആ വിലാസത്തിൽ ആധാർ കാർഡ് വരെ എടുത്തു. ഇതിനിടയിലാണ് അലമാരയിൽ സൂക്ഷിച്ചിരുന്ന ആഭരണങ്ങൾ പലതവണയായി​​ മോഷ്ടിച്ചത്. ഓരോ ആഭരണവും എടുക്കുമ്പോൾ സമാനമായ മുക്കുപണ്ടം പകരം വയ്ക്കുന്നതായി​രുന്നു രീതി​. ഇങ്ങനെയാണ് 20 പവൻ മോഷ്ടിച്ചത്. ആഭരണങ്ങൾക്ക് നിറവ്യത്യാസം വന്നപ്പോൾ വീട്ടുകാർക്ക് സംശയമായി. പൊലീസിൽ പരാതി നൽകിയതോടെ മനോജ് ഒളിവിൽ പോയി. കഴിഞ്ഞ ദിവസം കോഴിക്കോട്ടെ ഷൂട്ടിംഗ് ലൊക്കേഷനിൽ നിന്നാണ് മാരാരിക്കുളം പൊലീസ് ഇയാളെ പിടികൂടിയത്. മാരാരിക്കുളം സി.ഐ ജി.സുരേഷ് കുമാർ,എസ്.ഐ മാരായ ജാക്സൺ, അജിമോൻ, എ.എസ്.ഐ റെജിമോൻ, സി.പി.ഒ ജഗദീഷ് എന്നിവർ ചേർന്നായി​രുന്നു അറസ്റ്റ്. ഇയാളെ ആലപ്പുഴ ജുഡീഷ്യൽ ഫസ്​റ്റ് ക്ലാസ് മജിസ്‌ട്രേ​റ്റ് കോടതി റിമാൻഡ് ചെയ്തു. ഭാഗ്യക്കുറി എടുക്കാനാണ് മോഷണം നടത്തിയതെന്ന് മനോജ് പൊലീസിനോട് പറഞ്ഞു.