ചെറുകോൽ : മാവേലിക്കര ചെറുകോൽ ശ്രീ ശുഭാനന്ദാശ്രമത്തിലേക്ക് വർഷംതോറും നടത്തിവരാറുള്ള ചെറുകോൽ തീർത്ഥാടനത്തിന് നാളെ തുടക്കം കുറിക്കും. ആത്മബോധോദയസംഘം വിശ്വാസികൾ 12 വെള്ളിയാഴ്ചകളിലായി തുടർച്ചയായി അനുഷ്ഠിച്ച വ്രതത്തിന്റെ സമാപ്തികുറിച്ചാണ് തീർത്ഥാടനം. ശുഭാനന്ദനാമ സങ്കീർത്തനങ്ങൾ ആലപിച്ചു ഇരുമുടിക്കെട്ടുമേന്തിയാണ് ഭക്തജനങ്ങൾ തീർത്ഥാടനത്തിൽ പങ്കെടുക്കുന്നത്.

ഈ വർഷത്തെ 12വെള്ളിയാഴ്ച തീർത്ഥാടനം വിദേശത്തു നിന്നും മറ്റു സംസ്ഥാനങ്ങളിൽ നിന്നുമുള്ള ഭക്തജനങ്ങളെ ഉൾപ്പെടുത്തി 7 ദിവസങ്ങളിലായി നാളെ മുതൽ 2023 ജനുവരി 1വരെയാണ് നടക്കുക. ആദ്യ തീർത്ഥാടന സംഘമായ ചെറുകോൽ സഭ നാളെ രാവിലെ 7ന് ആശ്രമസന്നിധിയിൽ എത്തിച്ചേരും. തുടർന്ന് ആശ്രമാധിപതി ദേവാനന്ദഗുരുദേവൻ ഭക്തജനങ്ങൾ സമർപ്പിക്കുന്ന ഇരുമുടിക്കെട്ടുകൾ സ്വീകരിച്ചു അനുഗ്രഹപ്രഭാഷണം നടത്തും.

തീർത്ഥാടനത്തെ വരവേൽക്കാൻ എല്ലാ ക്രമീകരണങ്ങളും സജ്ജീകരിച്ചതായി ആത്മബോധോദയ സംഘം ശ്രീശുഭാനന്ദ ട്രസ്റ്റ് സെക്രട്ടി സ്വാമി ഗീതാനന്ദൻ അറിയി ച്ചു. ശുഭാനന്ദദർശനം വേദാന്ത സാംസ്കാരിക മാസിക മാനേജിംഗ് എഡിറ്റർ എൻ.രാധാകൃ ഷ്ണൻ, പരുമല മനോജ്, രമേശ് ആശ്രമം, രത്നകുമാർ എന്നിവർ വാർത്താസമ്മേളനത്തിൽ പങ്കെടുത്തു.