കൊച്ചി: ജാതിഭേദവും മതദ്വേഷവുമില്ലാതെ സർവരും പ്രവേശിക്കുന്ന ശബരിമലയിൽ മേൽശാന്തിയെ നിശ്ചയിക്കുമ്പോൾ മലയാളി ബ്രാഹ്മണർക്ക് മാത്രമെന്ന നീചവും നിന്ദ്യവുമായ രീതി അവസാനിപ്പിക്കണമെന്ന് എസ്.എൻ.ഡി.പി യോഗം കണയന്നൂർ യൂണിയൻ ചെയർമാൻ മഹാരാജ ശിവാനന്ദൻ ആവശ്യപ്പെട്ടു. ശ്രീനാരായണ എംപ്ലോയീസ് ഫോറത്തിന്റെയും പെൻഷനേഴ്‌സ് കൗൺസിലിന്റെയും എറണാകുളം ജില്ലാ സമ്മേളനം ഉദ്ഘാടനം ചെയ്യുകയായിരുന്നു അദ്ദേഹം.

ഇത്തരം ആവശ്യങ്ങൾ ഉന്നയിച്ചു സംസാരിക്കുന്ന യോഗം ജനറൽ സെക്രട്ടറി വെള്ളാപ്പള്ളി നടേശനെ തകർക്കാൻ ചില ഛിദ്രശക്തികൾ ഒളിഞ്ഞും തെളിഞ്ഞും ശ്രമിക്കുന്നത് വിജയിക്കില്ല. പ്രാകൃത നിയമങ്ങളെ നിയമപരമായും സംഘടനാപരമായും നേരിടണം. ഭാവിതലമുറക്ക് സ്വതന്ത്രമായി മണ്ണിൽ കാൽകുത്താൻ കളം ഒരുക്കണം ചാതുർവർണ്യ വ്യവസ്ഥയിൽ നിലനിന്ന പ്രാകൃത നിയമം കൊണ്ടുവരാനുള്ള നിഗൂഢ ശ്രമം എന്ത് വില കൊടുത്തും തടയുമെന്നും അദ്ദേഹം പറഞ്ഞു.

ശ്രീനാരായണ പെൻഷനേഴ്‌സ് കൗൺസിൽ സംസ്ഥാന പ്രസിഡന്റ് പി.ആർ. ജയചന്ദ്രൻ അദ്ധ്യക്ഷത വഹിച്ചു. യോഗം കൗൺസിലർ പി.കെ. പ്രസന്നൻ മുഖ്യപ്രഭാഷണം നടത്തി. ശ്രീനാരായണ എംപ്ലോയീസ് ഫോറത്തിന്റെയും പെൻഷനേഴ്‌സ് കൗൺസിലിന്റെയും സംസ്ഥാന കോ ഓർഡിനേറ്റർ പി.വി. രജിമോൻ, എംപ്ലോയീസ് ഫോറം കേന്ദ്ര സമിതി പ്രസിഡന്റ് എസ്. അജുലാൽ, കേന്ദ്ര സമിതി സെക്രട്ടറി കെ.പി. ഗോപാലകൃഷ്ണൻ, പെൻഷനേഴ്‌സ് കൗൺസിൽ സെക്രട്ടറി കെ.എം. സജീവ്, എംപ്ലോയീസ് ഫോറം കേന്ദ്ര വൈസ് പ്രസിഡന്റ് ബൈജു ജി., എംപ്ലോയീസ് ഫോറം കേന്ദ്ര ട്രഷറർ ഡോ. വിഷ്ണു, പെൻഷനേഴ്‌സ് കൗൺസിൽ ട്രഷറർ ഡോ.ആർ. ബോസ്, കണയന്നൂർ യൂണിയൻ സെക്രട്ടറി എം.ഡി. അഭിലാഷ്, വൈപ്പിൻ യൂണിയൻ സെക്രട്ടറി ടി.ബി. ജോഷി, പറവൂർ യൂണിയൻ പ്രസിഡന്റ് സി.എൻ. രാധാകൃഷ്ണൻ, കൊച്ചി യൂണിയൻ സെക്രട്ടറി ഷൈൻ, പൊന്നുരുന്നി ഉമേശ്വരൻ, എം. ശ്രീലത, ബിബിൻ ബാബു പറവൂർ, അരുൺ കുമാർ മൂവാറ്റുപുഴ, സുനിൽ ഘോഷ് ആലുവ, കെ.ബി. രേഖ, ശ്രീകാന്ത് ചാരുംമൂട്, വി.കെ. രഘുവരൻ, ഐഷ രാധാകൃഷ്ണൻ എന്നിവർ സംസാരിച്ചു.