നെടുമ്പാശേരി: അനധികൃതമായി സ്വർണം കടത്താൻ ശ്രമിച്ച മൂന്ന് യാത്രക്കാരെ കസ്റ്റംസ് എയർ ഇന്റലിജൻസ് വിഭാഗം പിടികൂടി. ഒരാൾ ശ്രീലങ്കൻ സ്വദേശിയാണ്. 86 ലക്ഷംരൂപ വിലവരുന്ന സ്വർണമാണ് പിടിച്ചെടുത്തത്. ദുബായിൽ നിന്നെത്തിയ തൃശൂർ സ്വദേശി തോമസ് കാപ്‌സ്യൂൾ രൂപത്തിലാക്കിയ 1186 ഗ്രാം സ്വർണം ശരീരത്തിൽ ഒളിപ്പിച്ചാണ് കടത്താൻ ശ്രമിച്ചത്.

ദുബായിൽ നിന്നെത്തിയ മറ്റൊരു യാത്രക്കാരനായ മതിലകം സ്വദേശി മുഹമ്മദ് 278 ഗ്രാം സ്വർണം ഹാൻഡ്ബാഗിൽ ഒളിപ്പിച്ചുകടത്താൻ ശ്രമിക്കുകയായിരുന്നു. ശ്രീലങ്കൻ എയർലൈൻസ് വിമാനത്തിൽ കൊളംബോയിൽ നിന്നെത്തിയ ശ്രീലങ്കൻ സ്വദേശി മുഹമ്മദ് മുഫ്‌നി 838.43 ഗ്രാം സ്വർണമിശ്രിതവുമായി പിടിയിലായി. രണ്ട് അടിവസ്ത്രങ്ങൾ ചേർത്ത് തുന്നിയശേഷം അതിനകത്താണ് ഇയാൾ സ്വർണം ഒളിപ്പിച്ചിരുന്നത്. 28 ലക്ഷം രൂപയുടെ സ്വർണം ഇതിൽനിന്ന് വേർതിരിച്ചെടുത്തു.