തൃപ്പൂണിത്തുറ: കണ്ണൻകുളങ്ങര കവലയോട് ചേർന്നുള്ള റേഷൻകടയുടെ മുമ്പിലുള്ള റോഡ് തകർന്നി​ട്ട് മാസങ്ങളേറെയായി. മിനി ബൈപ്പാസിൽ നിന്ന് മാർക്കറ്റ് റോഡിൽ നിന്നുമുള്ള വാഹനങ്ങൾ വൈക്കം റോഡിൽ ചേരുന്ന നാൽക്കവലയാണ് കണ്ണൻകുളങ്ങര.

റോഡ് ലെവലിൽ നിന്ന് രണ്ടടിയോളം താഴെയുള്ള റേഷൻകടയുടെ ഈ ഭാഗത്ത് കടയിലേക്ക് എത്തുന്നവർ തെന്നിവീഴുന്നത് പതിവ് കാഴ്ചയാണ്. മിനി ബൈപ്പാസിൽ നിന്ന് വേഗത്തി​ൽ എടുക്കുന്ന ഇരുചക്ര വാഹനങ്ങളും ഭീഷണി തന്നെയാണ്. ഫുട്പാത്ത് കൈയേറി ഇതിനോട് ചേർന്ന് ഒരു പച്ചക്കറിക്കടയും പ്രവർത്തിക്കുന്നുണ്ട്. ടൈലുകളെല്ലാം തകർന്ന് കാൽനടയാത്രക്കാർക്ക് ഉപദ്രവമായ റോഡിനെ കുറിച്ച് പലതവണ പരാതി കൊടുത്തെങ്കിലും കരാറുകാരെ കിട്ടാനില്ലെന്ന ന്യായം പറഞ്ഞു ഒഴിയുകയാണ് പൊതുമരാമത്ത് വകുപ്പെന്ന് നാട്ടുകാർ പറയുന്നു.