കൊച്ചി: പാശ്ചാത്യവത്കരിക്കലല്ല ആധുനികതയെന്നും കൊളോണിയൽ കാലത്തെ ജഡ്ജിമാർക്ക് നാട്ടിൽപ്പോകാൻ രണ്ടുമാസം അവധി പ്രഖ്യാപിച്ച അപരിഷ്‌കൃതനിയമം മാറ്റണമെന്നും കേന്ദ്രമന്ത്രി വി. മുരളീധരൻ പറഞ്ഞു. കൊച്ചി അന്താരാഷ്ട്ര പുസ്തകോത്സവ വേദിയിൽ സംഘടിപ്പിച്ച രാജാറാം മോഹൻറോയിയുടെ 250-ാം ജയന്തി ആഘോഷം ഉദ്ഘാടനം ചെയ്യുകയായിരുന്നു അദ്ദേഹം. പഞ്ചായത്ത് മുതൽ മുകളിലേക്കുള്ള എല്ലാ സംവിധാനങ്ങളും ഇത്തരം അവധി കൂടാതെ സമൂഹത്തിനുവേണ്ടി പ്രവർത്തിക്കുമ്പോൾ കോടതികളും അത്തരത്തിൽ ചിന്തിക്കേണ്ട സമയം അതിക്രമിച്ചിരിക്കുന്നു.

സ്ത്രീസമത്വത്തെക്കുറിച്ചും മാദ്ധ്യമ സ്വാതന്ത്ര്യത്തെക്കുറിച്ചും മനുഷ്യത്വത്തെക്കുറിച്ചും പറയുകയും നടപ്പിലാക്കുകയും ചെയ്ത രാജാറാം മോഹൻറോയിയുടെ ചിന്തകൾക്ക് വിപരീതമാണ് ഇന്ന് കേരളത്തിലെ സ്ത്രീസമൂഹത്തെ നരബലിക്ക് ഇരയാക്കുന്നത്. ഇതിൽ ഒരു ഇടപെടൽ കേരള സമൂഹത്തിൽ ഉയർന്നുവരണമെന്നും അദ്ദേഹം പറഞ്ഞു. അഡ്വ. എൻ.ഡി. പ്രേമചന്ദ്രൻ അദ്ധ്യക്ഷത വഹിച്ചു.

ജസ്റ്റിസ് പി. എസ്. ഗോപിനാഥൻ, ടി.ജെ. വിനോദ് എം.എൽ.എ, എം.എസ്. ശ്രീകല, സി.ജി. രാജഗോപാൽ എന്നിവർ സംസാരിച്ചു.