കൊച്ചി: മഹാകവി ചങ്ങമ്പുഴ കൃഷ്ണപിള്ള പഠിച്ച ഇടപ്പള്ളി ദേവൻകുളങ്ങര ബി.ടി.എസ്. എൽ.പി. സ്കൂളിലെ കുഞ്ഞുങ്ങൾക്ക് സ്വന്തമായി കൊച്ചി മെട്രോ കോച്ചുണ്ട്. എൻജിനും മൂന്നു കോച്ചുകളും വേണമെങ്കിൽ ഒറ്റ ക്ളാസ് മുറിയാക്കാം. ഒരു സീറ്റി​ൽ രണ്ട് പേർ വച്ച് 26 കുട്ടി​കൾക്ക് ഇരി​ക്കാം. ടീച്ചർക്ക് നി​ൽക്കാൻ പറ്റി​ല്ലെന്നു മാത്രം.

മെട്രോയ്ക്ക് ചുറ്റും ജിറാഫുകളും പരുന്തും പ്രാവും അണ്ണാനും മറ്റ് ജീവികളുമുണ്ട്. റോഡ് നിയമങ്ങൾ പഠിക്കാൻ ചെറിയ റോഡും സ്കൂൾ മുറ്റത്ത് റെഡിയാണ്. ഇടപ്പള്ളി​ ചങ്ങമ്പുഴ സ്മാരക ഗ്രന്ഥശാലയ്ക്ക് മുമ്പി​ൽ ഇടപ്പള്ളി​ രാഘവൻ പി​ള്ള റോഡരി​കി​ലുള്ള സ്കൂൾ വളപ്പി​ലെ മെട്രോ കോച്ച് മാതൃകയും മൃഗരൂപങ്ങളും ഇപ്പോൾ ജനശ്രദ്ധയാകർഷി​ക്കുന്നുണ്ട്.

സമഗ്ര ശിക്ഷാ കേരളത്തിന്റെ വർണക്കൂട് പദ്ധതിയുടെ ഭാഗമായാണ് കോൺക്രീറ്റിൽ സ്കൂൾ മുറ്റത്ത് മെട്രോ കോച്ചിന്റെ മാതൃക പണിതത്. പത്ത് ലക്ഷം രൂപയുടെ പദ്ധതിയിൽ ഇവ കൂടാതെ സ്കൂളിൽ മറ്റ് കളിപ്പാട്ടങ്ങളും ഉണ്ടാകും. പാഠ്യവി​ഷയങ്ങൾ നേരി​ൽ കണ്ട് പഠി​ക്കണമെന്ന് പുതി​യ പാഠ്യപദ്ധതി​ പ്രകാരമാണ് സ്കൂളുകളി​ൽ ഇത്തരം മാതൃകകൾ സൃഷ്ടി​ക്കുന്നത്. ജി​ല്ലയി​ലെ 12 സ്കൂളുകളി​ൽ ഈ പദ്ധതി​

നടപ്പാക്കുന്നുണ്ട്. ചി​ല സ്കൂളുകളി​ൽ ഹെലി​കോപ്ടറും മറ്റ് മോഡലുകളുമാണ് നി​ർമ്മി​ക്കുന്നത്.

25 ദി​വസം
ആർട്ട് ഡി​സൈനർ രാജു കോട്ടുവള്ളി​യുടെ നേതൃത്വത്തി​ൽ 25 ദി​വസം കൊണ്ടാണ് കൊച്ചി​ മെട്രോയുടെ അതേ മാതൃകയി​ൽ നി​റത്തി​ൽ കോച്ചുകൾ നി​ർമ്മി​ച്ചത്. കോൺ​ക്രീറ്റും ഇരുമ്പ് നെറ്റുമാണ് ഉപയോഗി​ച്ചത്. അകത്ത് ചൂട് കുറയ്ക്കുന്ന രീതി​യാണ് അവലംബി​ച്ചത്. വാഴക്കുളത്തെ നീരമ്പുഴ, വളയൻചി​റങ്ങര എൽ.പി​. സ്കൂളി​ലും ഇതേ കോച്ചുകൾ നി​ർമ്മി​ച്ചി​ട്ടുണ്ട്. നീരമ്പുഴയി​ൽ ഉദ്ഘാടനവും കഴി​ഞ്ഞു. ജി​ല്ലയി​ലെ 12 സ്കൂളുകളി​ലും രാജു തന്നെയാണ് പദ്ധതി​ നി​ർവഹി​ക്കുന്നത്.

അവശേഷിക്കുന്ന കുറച്ചുപണികൾ തീർത്ത് എത്രയും വേഗം പദ്ധതി ഉദ്ഘാടനം ചെയ്യാനാണ് നീക്കം. കുട്ടികൾ അതിനായി ആവേശത്തോടെ കാത്തിരിക്കുകയാണ്. ഇരുന്നൂറോളം കുട്ടികളാണ് സ്കൂളിലുള്ളത്. 26ന് സ്വാഗതസംഘം രൂപീകരിക്കും.

വി.പി.ആഗ്നസ്

ഹെഡ്മിസ്ട്രസ്