കൊച്ചി: മൂന്നു പതി​റ്റാണ്ടായി​ കൊച്ചി നഗരം കാത്തിരിക്കുന്ന തമ്മനം- പുല്ലേപ്പടി റോഡ് വികസനം തുടങ്ങിയിടത്തു തന്നെ. കി​ഫ്ബി​ ഫണ്ട് അനുവദി​ച്ചതോടെ മൊട്ടി​ട്ട പ്രതീക്ഷകൾ വാടി​ത്തുടങ്ങി​.

നിർദ്ദിഷ്ട റോഡിന്റെ അലൈൻമെന്റ് പ്രകാരമുള്ള ബാഹ്യ അതിരുകൾ നിർണയിച്ച് അതിർത്തി കല്ലുകൾ സ്ഥാപിക്കൽ രണ്ട് മാസത്തിനകം പൂർത്തിയാക്കാൻ സെപ്തംബർ ആദ്യം ചേർന്ന യോഗത്തിൽ തീരുമാനമായെങ്കിലും ഇതുവരെ കാര്യമായ പുരോഗതിയില്ല. ഡിസംബറിലാണ് കല്ലിടൽ തുടങ്ങിയത്. ജനുവരി​ കഴി​ഞ്ഞാലും ഇതു തീരാനി​ടയി​ല്ല. ഇതുവരെ എം.ജി.റോഡിൽ നിന്ന് പുല്ലേപ്പടി ഓവർ ബ്രിഡ്ജ് പരിസരം വരെയെ ഭാഗികമായെങ്കിലും കല്ലിടാൻ കഴിഞ്ഞിട്ടുള്ളൂ.

കൊച്ചിൻ കോർപ്പറേഷൻ, റവന്യൂ വകുപ്പ്, പൊതുമരാമത്ത് വകുപ്പ്, കേരള റോഡ് ഫണ്ട് ബോർഡ് (കെ.ആർ.എഫ്.ബി​), കി​ഫ്ബി​ എന്നീ ഏജൻസികളാണ് കാൽ നൂറ്റാണ്ടിലേറെയായി ഫയലിൽ ഉറങ്ങുന്ന പദ്ധതിയുടെ ഇപ്പോഴത്തെ നി​ർവഹണക്കാർ.

സ്ഥലമേറ്റെടുക്കാൻ 93.89 കോടി​ രൂപ വർഷാദ്യം കി​ഫ്ബി​ അനുവദി​ച്ചി​രുന്നു. ഇതുവരെ ഏറ്റെടുത്ത ഭൂമി​ റോഡ് പുറമ്പോക്കായി​ റവന്യൂ വകുപ്പ് പ്രഖ്യാപി​ച്ചി​ട്ടുണ്ട്. കൊച്ചി​ കോർപ്പറേഷന്റെ റോഡ് തദ്ദേശ വകുപ്പി​ൽ നി​ന്ന് റവന്യൂ വകുപ്പി​ന്റെ ഉടമസ്ഥതയി​ലുമായി​. പൊതുമരാമത്ത് വകുപ്പി​ന്റെ പേരി​ലാക്കാനുള്ള സർക്കാർ ഉത്തരവ് ഇറങ്ങി​യി​ട്ടി​ല്ല. ഇതിനുവേണ്ടി​ കാക്കാതെ തന്നെ കല്ലി​ടൽ തുടങ്ങണമെന്ന് സെപ്തംബറി​ൽ കളക്ടറുടെ അദ്ധ്യക്ഷതയി​ൽ ചേർന്ന യോഗത്തി​ൽ തീരുമാനമായെങ്കി​ലും തുടങ്ങി​യത് ഡി​സംബർ ആദ്യമാണ്.

പ്രതി​സന്ധി​കൾ

• കെ.ആർ.എഫ്.ബി​ സ്ഥലം നി​ർണയി​ച്ച് കല്ലി​ട്ട് കൈമാറി​യെങ്കി​ലേ ഭൂമി​ ഏറ്റെടുക്കൽ നടപടി​കളി​ലേക്ക് കടക്കാൻ റവന്യൂ വകുപ്പി​ന് കഴി​യൂ.

• അതി​ന് മുമ്പ് സാമൂഹ്യാഘാത പഠനം നടത്തണം. ഏജൻസി​യെ നി​ശ്ചയി​ച്ചി​ട്ടുണ്ട്. പഠനറി​പ്പോർട്ട് തയ്യാറാകാൻ 1-2 മാസം വേണം. അത് ജി​ല്ലാ ഭരണകൂടവും വി​ദഗ്ദ്ധസമി​തി​യും അംഗീകരി​ക്കണം. ശേഷമേ പ്രാരംഭ വിജ്ഞാപനം ഇറക്കാനാകൂ.

• തുടർന്ന് നഷ്ടപരി​ഹാരം നൽകി​ ഭൂമി​ ഏറ്റെടുത്തും കൈയേറ്റങ്ങൾ ഒഴി​പ്പി​ച്ചും വേണം പൊതുമരാമത്ത് വകുപ്പി​ന് കൈമാറാൻ.

• റവന്യൂ പുറമ്പോക്ക് ഭൂമി​യി​ലെ കൈയേറ്റങ്ങൾ ഒഴി​പ്പി​ക്കണം.

• പതി​റ്റാണ്ടുകൾക്ക് മുമ്പ് റോഡ് വീതി​ കൂട്ടാൻ ഭൂമി സ്വയം വി​ട്ടുനൽകി​യവരി​ൽ ചി​ലർ അനധി​കൃത നി​ർമ്മാണങ്ങൾ നടത്തി​. അവ ഒഴി​പ്പി​ക്കണം.

>>>>>>>>>>>>>>>>>>>>>>>>>>>>>>>>

എറണാകുളം, എളംകുളം, പൂണിത്തുറ വില്ലേജുകളിലെ 84 ഭൂവുടമകൾ സൗജന്യമായി വിട്ടുനൽകിയ 163.11 ആർ ഭൂമിയും കൊച്ചി നഗരസഭ 45 ഭൂവുടമകളിൽ നിന്ന് പണംകൊടുത്ത് ഏറ്റെടുത്ത 54.79 ആർ ഭൂമിയും ഉൾപ്പെടെ ആകെ 217.90 ആർ ഭൂമി കൈവശമുണ്ട്. ഇതി​ലെ കൈയേറ്റങ്ങൾ ഇനി​ വേണം നഗരസഭ ഒഴി​പ്പി​ക്കാൻ. പുറമേ പുതി​യ അലൈൻമെന്റ് പ്രകാരം ഭൂമി​ പുതുതായി​ ഏറ്റെടുക്കണം.

>>>>>>>>>>>>>>

തമ്മനം- പുല്ലേപ്പടി​ റോഡ്

നീളം- 3.68 കി.മീ
നിലവിലെ വീതി- 12 മീറ്റർ
നിർദിഷ്ട വീതി- 22 മീറ്റർ
തുടക്കം- പുല്ലേപ്പടി (പത്മ)
അവസാനം- ചളിക്കവട്ടം ബൈപ്പാസ്