പറവൂർ: ചാവറ തീർത്ഥാടന കേന്ദ്രമായ കൂനമ്മാവ് സെന്റ് ഫിലോമിനാസ് പള്ളിയിൽ വിശുദ്ധ ചാവറ കുര്യാക്കോസ് ഏലിയാസച്ചന്റെ തിരുനാളിന് കൊടികയറി. കൊല്ലം രൂപതാ ബിഷപ്പ് എമരിത്തൂസ് ഡോ. സ്റ്റാൻലി റോമൻ കൊടികയറ്റത്തിനും തുടർന്ന് നടന്ന ദിവ്യബലിക്കും മുഖ്യകാർമ്മികത്വം വഹിച്ചു. ഒമ്പത് നീണ്ടുനിൽക്കുന്ന തിരുനാൾ ജനുവരി മൂന്നിന് സമാപിക്കും. 30ന് കാൽലക്ഷം പേർ പങ്കെടുക്കുന്ന നേർച്ചസദ്യ നടക്കും.തിരുനാൾ ദിനങ്ങളിൽ രാവിലെ 6നും 7നും 10.30നും വൈകിട്ട് 5.30നും ദിവ്യബലി, നൊവേന, ആരാധന എന്നിവ ഉണ്ടാകും.30ന് രാവിലെ 9.30ന് ആഘോഷമായ ദിവ്യബലിയില്‍ കണ്ണൂർ രൂപതാ ബിഷപ്പ് ഡോ. അലക്‌സ് വടക്കുംതല കാർമ്മികത്വം വഹിക്കും. തുടർന്ന് നേർച്ചസദ്യ, ആശീർവാദവും വിതരണവും. സദ്യ രാത്രി എട്ട് വരെ നീണ്ടുനിൽക്കും. ഉച്ചയ്ക്ക് 12നും 2നും വൈകിട്ട് 4നും 5.30നും 7നും ദിവ്യബലിയും നൊവേനയും നടക്കും. ജനുവരി ഒന്നിന് വൈകിട്ട് ദിവ്യബലിക്കു ശേഷം നാടകം. തിരുനാൾ ദിനമായ ജനുവരി മൂന്നിന് വൈകിട്ട് അ‌‌ഞ്ചിന് കബറിടത്തിങ്കലിൽ നടക്കുന്ന ദിവ്യബലിക്ക് വരാപ്പുഴ മെത്രാപ്പൊലീത്ത ഡോ. ജോസഫ് കളത്തിപ്പറമ്പിൽ കാർമ്മികത്വം വഹിക്കും. തുടർന്ന് രോഗികൾക്ക് ധനസഹായ വിതരണം, പ്രദക്ഷിണം, ദീപക്കാഴ്ച, രാത്രി എട്ടിന് ഗാനമേള.