പറവൂർ: ചാവറ തീർത്ഥാടന കേന്ദ്രമായ കൂനമ്മാവ് സെന്റ് ഫിലോമിനാസ് പള്ളിയിൽ വിശുദ്ധ ചാവറ കുര്യാക്കോസ് ഏലിയാസച്ചന്റെ തിരുന്നാളിന്റെ ഭാഗമായി നടന്ന നേർച്ചസദ്യയിൽ ആയിരങ്ങൾ പങ്കെടുത്തു. കണ്ണൂർ രൂപതാ ബിഷപ്പ് ഡോ. അലക്സ് വടക്കുംതല നേർച്ചസദ്യ ആശിർവാദത്തിനും ദിവ്യബലിക്കും കാർമ്മികത്വം വഹിച്ചു. ഫാ. സേവ്യാർ കുട്ടൻചാലിൽ, ഫാ. കുര്യാക്കോസ് ചന്ദനപറമ്പിൽ എന്നിവർ സഹകാർമ്മികരായി. ഫാ. എബിൻ ജോസ് വാരയിത്ത് വചന സന്ദേശം നൽകി. സുഖമില്ലാത്തവർക്കും മുതിർന്നവർക്കുമായി പ്രത്യേക കൗണ്ടറും നേർച്ച കിറ്റുകളും ഒരുക്കിയിരുന്നു. ഉച്ചയോടെ തുടങ്ങിയ നേർച്ചസദ്യ രാത്രി വരെ നീണ്ടു. തിരുനാൾ ദിനമായ ജനുവരി മൂന്നിന് കബറിടത്തിങ്കലിൽ നടക്കുന്ന ദിവ്യബലിക്ക് വരാപ്പുഴ മെത്രാപ്പോലീത്ത ഡോ. ജോസഫ് കളത്തിപ്പറമ്പിൽ കാർമ്മികത്വം വഹിക്കും. ഫാ. ലാസർ സിന്റോ തൈപ്പറമ്പിൽ വചന സന്ദേശം നൽകും. തുടർന്ന് രോഗികൾക്ക് ധനസഹായ വിതരണം, പ്രദക്ഷിണം, ദീപക്കാഴ്ച, ഗാനമേള എന്നിവ നടക്കും.