കുമളി: കുമളിയിൽ എത്തുന്ന യാത്രക്കാർക്ക് ശുദ്ധമായ കുടിവെള്ളം ലഭ്യമാക്കുന്നതിന് ബസ് സ്റ്റാൻഡ് കാത്തിരിപ്പ് കേന്ദ്രത്തിൽ വാട്ടർ പ്യൂരിഫയർ സ്ഥാപിച്ചു. ശുചിത്വമിഷന്റെയും പഞ്ചായത്തിന്റെയും ഫണ്ട് ഉപയോഗിച്ച് സ്ഥാപിച്ച വാട്ടർ പ്യൂരിഫയറിന്റെ ഉദ്ഘാടനം ഗ്രാമപഞ്ചായത്ത് പ്രസിഡന്റ് ശാന്തി ഷാജിമോൻ നിർവഹിച്ചു. പഞ്ചായത്ത് വൈസ് പ്രസിഡന്റ് വി. കെ.ബാബുക്കുട്ടി അദ്ധ്യക്ഷത വഹിച്ചു.
ശബരിമല ദർശനത്തിനെത്തുന്ന അയ്യപ്പഭക്തർക്ക് സൗകര്യം ഏറെ പ്രയോജനം ചെയ്യും. ചൂടു വെള്ളവും തണുത്ത വെള്ളവും ഇവിടെ നിന്ന് ലഭിക്കും. ആരോഗ്യ വിദ്യാഭ്യാസ സ്റ്റാൻഡിങ് കമ്മറ്റി ചെയർമാൻ കെ. എം. സിദ്ദിഖ് സ്വാഗതം ആശംസിച്ചു. സ്റ്റാൻഡിങ് കമ്മറ്റി അദ്ധ്യക്ഷരായ നോളി ജോസഫ്, രജനി ബിജു, ടൗൺ വാർഡ് അംഗം വിനോദ് ഗോപി, പഞ്ചായത്ത് സെക്രട്ടറി സെൻകുമാർ, ക്ലീൻ കുമളി ഗ്രീൻ കുമളി മാനേജർ ജെയ്‌സൺ മാത്യു തുടങ്ങിയവർ പങ്കെടുത്തു.