ഇടുക്കി: പരിസ്ഥിതി സംബന്ധിച്ച നിയമസഭാ സമിതി 30ന് രാവിലെ 10ന് മൂന്നാർ ഗ്രാമപഞ്ചായത്ത് ഹാളിൽ യോഗം ചേരും. പള്ളിവാസൽ കെ.എസ്.ഇ.ബി വിപുലീകരണ പദ്ധതികളുടെ മറവിൽ വ്യാജ പട്ടയങ്ങൾ ഉണ്ടാക്കി അനധികൃത നിർമ്മാണം നടത്തുന്നതായി സമിതിക്ക് ലഭിച്ച നിവേദനത്തിന്മേൽ സ്വീകരിച്ച നടപടികൾ വിലയിരുത്തും. പരിസ്ഥിതി സംബന്ധിച്ച സമിതിയുടെ ഒന്നാമത് റിപ്പോർട്ടിന്റെ ആക്ഷൻ റിപ്പോർട്ടിൽ വിവിധ വകുപ്പുകൾ സ്വീകരിച്ച നടപടികൾ പരിശോധിക്കും. വിവിധ വകുപ്പുകളിലെ ജില്ലാതല ഉദ്യോഗസ്ഥർ, പരിസ്ഥിതി പ്രവർത്തകർ, പൊതുജനങ്ങൾ എന്നിവരിൽ നിന്നും സമിതി വിവര ശേഖരണം നടത്തും. ഇതര പാരിസ്ഥിതിക പ്രശ്‌നങ്ങൾ സംബന്ധിച്ച് നിവേദനങ്ങൾ സ്വീകരിക്കും. പള്ളിവാസൽ കെ.എസ്.ഇ.ബി വിപുലീകരണ പദ്ധതി പ്രദേശം, അനുബന്ധ പ്രദേശങ്ങൾ, മൂന്നാറിൽ പരിസ്ഥിതി മലിനീകരണ പ്രശ്‌നങ്ങൾ നേരിടുന്ന പ്രദേശങ്ങൾ എന്നിവ സഭാസമിതി സന്ദർശിക്കും.