തൊടുപുഴ: ബസിന് സൈഡ് നൽകുന്നതിനിടെ ട്രാക്ടർ മറിഞ്ഞ് ഡ്രൈവർക്ക് സാരമായി പരിക്കേറ്റു. മുതലക്കോടം കാപ്പിക്കുന്നേൽ അരുൺ ഐസക്കിനാണ് (30) പരിക്കേറ്റത്. ഇന്നലെ ഉച്ചയ്ക്ക് 2.30ന് കുന്നം കാരൂപ്പാറയിലായിരുന്നു അപകടം. തെന്നത്തൂരിൽ നിന്ന് തൊടുപുഴയ്ക്ക് വരികയായിരുന്ന സ്വകാര്യ ബസിന് സൈഡ് കൊടുക്കുന്നതിനിടെ അരുൺ ഓടിച്ച ട്രാക്ടർ റോഡരികിലെ തിട്ടയിൽ കയറി വട്ടം മറിയുകയായിരുന്നു. സമീപത്തുണ്ടായിരുന്ന മണ്ണ്മാന്തി യന്ത്രം ഉപയോഗിച്ച് ട്രാക്ടർ ഉയർത്തിയാണ് അരുണിനെ നാട്ടുകാർ പുറത്തെടുത്തത്. തുടർന്ന് മുതലക്കോടത്തെ സ്വകാര്യ ആശുപത്രിയിലെത്തിച്ചെങ്കിലും ഇടുപ്പെല്ലിനും തലയ്ക്കും സാരമായി പരിക്കേറ്റതിനാൽ കോലഞ്ചേരി മെഡിക്കൽ കോളേജിലേക്ക് കൊണ്ടുപോയി. തൊടുപുഴ ഫയർഫോഴ്സും പൊലീസും അപകടസ്ഥലത്തെത്തിയിരുന്നു.