കട്ടപ്പന: നഗരത്തിലെ കഞ്ചാവ് വിൽപ്പനക്കാരനെ പൊലീസ് പിടികൂടി. പൂവേഴ്‌സ് മൗണ്ട് പുൽപ്പാറയിൽ സബിൻ സഞ്ജയാണ് അറസ്റ്റിലായത്. ഇയാളുടെ കൈവശമുണ്ടായിരുന്ന ബാഗിൽ നിന്ന് 17 പൊതികളാക്കി സൂക്ഷിച്ചിരുന്ന 70 ഗ്രാം കഞ്ചാവും കണ്ടെടുത്തു. ഓടി രക്ഷപ്പെടാൻ ശ്രമിച്ച പ്രതിയെ പിന്തുടർന്നാണ് എസ്.ഐയുടെ നേതൃത്വത്തിലുള്ള സംഘം കീഴ്‌പ്പെടുത്തിയത്. ഏതാനും ദിവസങ്ങൾക്ക് മുമ്പ് നഗരത്തിലെ ഒറ്റപ്പെട്ട സ്ഥലത്ത് കഞ്ചാവ് വലിച്ചുകൊണ്ടിരുന്ന യുവാവിനെ എസ്.ഐ കെ. ദിലീപ്കുമാറിന്റെ നേതൃത്വത്തിൽ കസ്റ്റഡിയിലെടുത്തിരുന്നു. ഇയാളിൽ നിന്നാണ് ചില്ലറ വിൽപ്പനക്കാരനായ സബിനെക്കുറിച്ച് വിവരം ലഭിച്ചത്. തുടർന്ന് ആവശ്യക്കാരാണെന്ന വ്യാജേന കഴിഞ്ഞ ശനിയാഴ്ച പൊലീസ് ഇയാളുമായി ബന്ധപ്പെട്ടു. തുടർന്ന് നഗരത്തിലെ ബാറിലേക്ക് വിളിച്ചുവരുത്തി. കഞ്ചാവ് കേസിൽ മുമ്പ് പിടിയിലായിട്ടുള്ള സബിൻ മഫ്തിയിലായിരുന്ന പൊലീസിനെ തിരിച്ചറിഞ്ഞതോടെ കെട്ടിടത്തിന്റെ മതിൽ ചാടി ഓടി രക്ഷപ്പെട്ടു. ഒരു കിലോമീറ്ററിലധികം ഓടിയ യുവാവിനെ പൊലീസ് പിന്തുടർന്ന് പുതിയ ബസ് സ്റ്റാൻഡിന് സമീപം കുന്തളംപാറ റോഡിൽ വച്ച് സാഹസികമായി കീഴ്‌പ്പെടുത്തുകയായിരുന്നു. സ്‌കൂൾ- കോളേജ് വിദ്യാർത്ഥികൾക്ക് കഞ്ചാവ് വിൽക്കുന്ന സംഘത്തിലെ പ്രധാനിയാണ് സബിനെന്ന് പൊലീസ് പറഞ്ഞു.