ഇടുക്കി: നിയമസഭയുടെ പട്ടികജാതി, പട്ടികവർഗ്ഗ ക്ഷേമം സംബന്ധിച്ച സമിതി ഇന്ന് രാവിലെ 10 ന് ഇടമലക്കുടി ആദിവാസി കോളനികൾ സന്ദർശിക്കും. നാളെ രാവിലെ 11ന് മൂന്നാർ ഗ്രാമപഞ്ചായത്ത് കമ്മ്യൂണിറ്റി ഹാളിൽ യോഗം ചേർന്ന് സമിതിയുടെ പരിഗണനയിലുള്ളതും ജില്ലയിൽ നിന്നും ലഭിച്ചിട്ടുള്ളതുമായ പരാതികളിന്മേൽ ബന്ധപ്പെട്ട ഉദ്യോഗസ്ഥരിൽ നിന്ന് തെളിവെടുപ്പ് നടത്തും. പട്ടികജാതി, പട്ടികവർഗ്ഗ വിഭാഗത്തിൽപ്പെട്ടവർ നേരിടുന്ന വിവിധ പ്രശ്‌നങ്ങൾ സംബന്ധിച്ച് വ്യക്തികളിൽ നിന്നും സംഘടനകളിൽ നിന്നും നിവേദനങ്ങൾ സ്വീകരിക്കുകയും ബന്ധപ്പെട്ട ഉദ്യോഗസ്ഥരുമായി ചർച്ച നടത്തുകയും ചെയ്യും.സമിതി മുൻപാകെ ഹർജികളും നിവേദനങ്ങളും നൽകാൻ താത്പര്യമുള്ള വ്യക്തികൾക്കും സംഘടനാ പ്രതിനിധികൾക്കും നാളത്തെ യോഗത്തിൽ ഹാജരായി ഹർജികളും നിവേദനങ്ങളും നേരിട്ട് സമർപ്പിക്കുകയും ചെയ്യാം.