കാസർകോട്: പൂണ്ടൂരിൽ കവുങ്ങിൻ പാലം തകർന്ന് വീണ് രണ്ട് പേർക്ക് പരിക്കേറ്റു. ഇന്നലെ വൈകിട്ടാണ് അപകടം. കാറഡുക്ക പഞ്ചായത്ത് 15ാം വാർഡ് പുണ്ടൂർ ശാസ്താംകോട്ട കല്ലൂങ്കോളിലെ താൽകാലിക കവുങ്ങിൻ പാലമാണ് തകർന്നത്. പാലത്തിൽ നിന്ന് വീണ് കുമ്പളയിലെ ഖദീജ(50), മിസ്രിയ(35) എന്നിവർക്കാണ് പരിക്കേറ്റത്. പാലത്തിന്റെ അക്കരയിലുള്ള അബ്ദുല്ല എന്നയാൾ കഴിഞ്ഞ ദിവസം രാവിലെ മരിച്ചിരുന്നു.

മരണവീട്ടിലേക്ക് ആളുകൾ പോകുന്നതിനിടെയാണ് കാലപ്പഴക്കം ചെന്ന പാലം തകർന്ന വീണത്. മരണവീട്ടിലേക്ക് വരികയായിരുന്നവരാണ് അപകടത്തിൽ പെട്ടത്. പരിക്കേറ്റവരെ കാസർകോട്ടെ സ്വകാര്യ ആസ്പത്രിയിൽ പ്രവേശിപ്പിച്ചു. അക്കരെ എത്താൻ ഏക ആശ്രയമായിരുന്ന കവുങ്ങിൻ പാലം തകർന്നതോടെ നാട്ടുകാർ ദുരിതത്തിലായി. അതിനിടെ മയ്യത്ത് ഖബർസ്ഥാനിലെത്തിക്കാനായി നാട്ടുകാരുടെ ശ്രമഫലമായി താൽക്കാലിക പാലം ഒരുക്കി. നേരത്തേ ശാസ്താംകോട്ട കലുങ്കോൽ അണക്കെട്ടിന് സമീപത്തായി കോൺക്രീറ്റ് പാലം നിർമിച്ചിരുന്നു. എന്നാൽ നിർമാണത്തിലെ ക്രമക്കേടുകൾ കാരണം കാലവർഷത്തിൽ ഈ പാലം നാല് വർഷം മുമ്പ് തകർന്നു. പുതിയ പാലം നിർമിക്കണമെന്ന് നാട്ടുകാർ പലതവണ ആവശ്യപ്പെട്ടെങ്കിലും ഫലമുണ്ടായില്ല.