തലശ്ശേരി: ജില്ല ലീഗൽ സർവ്വീസസ് അതോറിറ്റിയുടെ നേതൃത്വത്തിൽ തലശ്ശേരി, ഇരിട്ടി താലൂക്കുകൾ ഉൾപ്പെടുന്ന മേഖലകളിൽ മൊബൈൽ അദാലത്തും സൗജന്യ നിയമ സേവനവും ആരംഭിച്ചു. ജനുവരി അഞ്ചുവരെ തടരും.

മുബാറക് ഹയർസെക്കൻഡറി സ്‌കൂളിൽ സബ് ജഡ്ജിയും ജില്ല ലീഗൽ സർവ്വീസ് അതോറിറ്റി സെക്രട്ടറിയുമായ വിൻസി ആർ. പീറ്റർ ജോസഫ് ഉദ്ഘാടനം നിർവ്വഹിച്ചു. സമൂഹത്തിൽ ഉരുത്തിരിയുന്ന ഏതുതരം പ്രശ്നങ്ങളും മധ്യസ്ഥതയിലൂടെ സാമ്പത്തിക നഷ്ടം ഇല്ലാതെ രമ്യമായി പരിഹരിക്കുന്നതിനുവേണ്ടിയാണ് ഇത്തരം അദാലത്തുകൾ സംഘടിപ്പിച്ചിട്ടുള്ളതെന്നും നിയമ സഹായം സാധാരണക്കാരുടെ വാതിൽ പടിയിലെത്തിക്കുന്ന സംവിധാനമാണ് മൊബൈൽ അദാലത്തിലൂടെ സാധിക്കുന്നതെന്നും ജഡ്ജി പറഞ്ഞു.

തലശ്ശേരി നഗരസഭ ക്ഷേമകാര്യ സ്ഥിരം സമിതി ചെയർമാൻ ടി.സി അബ്ദുൾ ഖിലാബ് അദ്ധ്യക്ഷത വഹിച്ചു. വാർഡ് കൗൺസിലർ അജേഷ്, മുബാറക് സ്‌കൂൾ മാനേജിംഗ് കമ്മിറ്റി പ്രസിഡന്റ് എ.കെ സക്കിരിയ എന്നിവർ സംസാരിച്ചു. ബി. രമേഷ് ബാബു സ്വാഗതവും ജൂസി ഡേവിഡ് നന്ദിയും പറഞ്ഞു. മുപ്പതോളം പരാതികൾ ബുധനാഴ്ച അദാലത്തിന്റെ പരിഗണനയിലെത്തി.

മൊബൈൽ അദാലത്തും സൗജന്യ നിയമ സേവനവും സബ് ജഡ്ജ് വിൻസി പീറ്റർ ഉദ്ഘാടനം ചെയ്യുന്നു