കോഴിക്കോട്: ഭക്ഷ്യമേഖലയിലെ സർക്കാർ ഇടപെടൽ ഫലപ്രദമാണെന്ന് പൊതുമരാമത്ത് -ടൂറിസം മന്ത്രി പി.എ.മുഹമ്മദ് റിയാസ് പറഞ്ഞു. ദേശീയ ഉപഭോക്തൃ അവകാശ ദിനാചരണം ജില്ലാ ആസൂത്രണ സമിതി ഹാളിൽ ഉദ്ഘാടനം ചെയ്യുകയായിരുന്നു മന്ത്രി. സാധനങ്ങൾ വിൽക്കുന്നവർക്ക് ഉള്ളതുപോലെ വാങ്ങുന്നവർക്കും അവകാശങ്ങളും കടമകളുമുണ്ടെന്ന് മന്ത്രി പറഞ്ഞു. തോട്ടത്തിൽ രവീന്ദ്രൻ എം.എൽ.എ അദ്ധ്യക്ഷത വഹിച്ചു. എ.ഡി.എം മുഹമ്മദ് റഫീഖ് മുഖ്യാതിഥിയായി. 'ഫെയർ ഡിജിറ്റൽ ഫിനാൻസിംഗ് ' എന്ന വിഷയത്തിൽ യൂണിയൻ ബാങ്ക് ചീഫ് മാനേജർ ആദർശ് വി.കെ ക്ലാസെടുത്തു. വിവിധ ഉപഭോക്തൃ സംഘടനാ പ്രതിനിധികളായ ടി.കെ.എ.അസീസ്, മോളി ജോർജ്, സക്കരിയ്യ പള്ളിക്കണ്ടി, അഡ്വ.പാലത്ത് ഇമ്പിച്ചിക്കോയ, അനിൽകുമാർ പേരാമ്പ്ര, പത്മനാഭൻ വേങ്ങേരി എന്നിവർ പ്രസംഗിച്ചു. ജില്ലാ സപ്ലൈ ഓഫീസർ കെ.രാജീവ് സ്വാഗതവും സിറ്റി റേഷനിംഗ് ഓഫീസർ പി.പ്രമോദ് നന്ദിയും പറഞ്ഞു. ദേശീയ ഉപഭോക്തൃ വാരാചരണത്തിന്റെ ഭാഗമായി ജില്ലയിലെ ഹൈസ്‌കൂൾ, ഹയർസെക്കൻഡറി വിദ്യാർത്ഥികൾക്കായി സംഘടിപ്പിച്ച ഉപന്യാസ രചന, പ്രസംഗം, ക്വിസ് മത്സരങ്ങളിലെ വിജയികൾക്ക് സമ്മാനങ്ങളും വിതരണം ചെയ്തു.