കോട്ടയം . ക്രിസ്മസ് - പുതുവത്സരാഘോഷത്തിന് മുന്നോടിയായി ലഹരി ഒഴുക്കിന് തടയിടാൻ എക്സൈസ് സ്പെഷ്യൽ ഡ്രൈവ് ആരംഭിച്ചു. ജനുവരി 3 വരെയാണ് ഡ്രൈവ്. രഹസ്യവിവര ശേഖരണത്തിനൊപ്പം പൊതുജനസഹായവും പ്രയോജനപ്പെടുത്തും. വില്ലേജുകൾ, തദ്ദേശസ്ഥാപനങ്ങൾ, സർക്കാർ ഇതര സ്ഥാപനങ്ങൾ എന്നിവിടങ്ങളിൽ നിന്ന് വിവരങ്ങൾ ശേഖരിക്കും. വ്യാജമദ്യത്തി​ന്റെ ഉത്പാദനവും വിതരണവും തടയുന്നതിന് സ്ഥിരം കുറ്റവാളികളുടെ പട്ടിക തയ്യാറാക്കി പ്രത്യേകം നിരീക്ഷിക്കും. 24 മണിക്കൂറും പ്രവർത്തിക്കുന്ന ജില്ലാതല കൺട്രോൾ റൂം ഡിവിഷൻ ഓഫീസിൽ തുറന്നു. കൂടാതെ എക്സൈസ് സർക്കിൾ ഓഫീസുകൾ കേന്ദ്രീകരിച്ച് മുഴുവൻ സമയ സ്ട്രൈക്കിം​ഗ് ഫോഴ്സുമുണ്ട്.

വനം, റവന്യൂ, പൊലീസ് എന്നിവരുമായി ചേർന്ന് അനധികൃത വാറ്റ് നടക്കുന്ന സ്ഥലങ്ങളിൽ സംയുക്ത റെയ്ഡ് നടത്തും. ചാരായവും കോടയും നശിപ്പിക്കുന്നതിന് റെയ്ഡുകൾക്കായി പൊലീസ്, ഡി എഫ് ഒ എന്നിവരുമായി ബന്ധപ്പെട്ട് ടീം രൂപീകരിച്ചു. അനധികൃത മദ്യനിർമ്മാണം, അന്യ സംസ്ഥാനങ്ങളിൽ നിന്നുള്ള സ്പിരിറ്റ് കള്ളക്കടത്ത്, സ്പിരിറ്റ് ചാരായമായും നിറം കലർത്തി വിദേശമദ്യമായും ഉപയോ​ഗിക്കൽ തുടങ്ങിയ പ്രവർത്തനങ്ങൾ ഉണ്ടാവാൻ സാദ്ധ്യതയുള്ളതിനാൽ ഇത് തടയണമെന്നാണ് നിർദ്ദേശം. കണ്ടെയ്നർ ലോറികൾ, പാഴ്സൽ സർവീസ് വാഹനങ്ങൾ, ടിപ്പർ ലോറികൾ, രഹസ്യയറയുള്ള ട്രക്കുകൾ, ടൂറി​സ്റ്റ് ബസുകൾ എന്നിവ പ്രത്യേകം പരിശോ​ധിക്കും.

കൊറിയർ സ‌വീസും നിരീക്ഷണത്തിൽ.

അന്യസംസ്ഥാന ബസുകളിലും ശക്തമായ പരിശോധന ഉണ്ടായേക്കും. ലഹരിക്കടത്ത് പ്രതിരോധിക്കുന്നതി​ന്റെ ഭാ​ഗമായി കൊറിയർ സർവീസുകളെയും നിരീക്ഷിക്കും. എം ഡി എം എ, എൽ എസ് ഡി ഉൾപ്പെടെയുള്ള സിന്തറ്റിക് ലഹരികൾ കൊറിയർ വഴി എത്തുന്നുണ്ടെന്നാണ് വിവരം. റെയിൽവേ ​സ്റ്റേഷനുകളിൽ ഉദ്യോ​ഗസ്ഥരുടെ അനുമതിയോടെ പ്രത്യേകം പരിശോധന നടത്തും.

സ്പെഷ്യൽ ഡ്രൈവ് ആരംഭിച്ചതിന് ശേഷമുള്ള കേസുകൾ.
അബ്കാരി 41.
എൻ ഡി പി എസ് 19.
കോട 70 ലിറ്റർ.
കഞ്ചാവ് 482 ​ഗ്രാം.
എം ഡി എം എ 11.69 ​ഗ്രാം.
​ബ്രൗൺ ഷു​ഗർ 400 മില്ലി ​ഗ്രാം.

ഡെപ്യൂട്ടി എക്‌സൈസ് കമ്മിഷണർ എം എൻ ശിവപ്രസാദ് പറയുന്നു.

ക്രിസ്മസ് പുതുവത്സര കാലയളവിൽ ജില്ലയിൽ കർശന പരിശോധന ഉണ്ടാകും. മാരക ലഹരി എത്തുന്നത് തടയാൻ അന്യസംസ്ഥാന ബസുകൾ, കൊറിയർ ഉൾപ്പെടെ നിരീക്ഷണം ശക്തമാക്കും.