കോട്ടയം : മെഡിക്കൽ കോളേജിലെ കളക്ഷൻ ടാങ്ക് നിറഞ്ഞ് മലിനജലം പുറത്തേക്ക് ഒഴുകുന്നു. കക്കൂസ് മാലിന്യം ഉൾപ്പെടെ സ്വകാര്യ വ്യക്തികളുടെ ഭൂമിയിലൂടെ ഒഴുകുന്നതോടെ മൂക്കുപൊത്തി കഴിയേണ്ട അവസ്ഥയാണ് നാട്ടുകാർക്ക്. മെഡിക്കൽ കോളേജിൽ 2011ൽ സ്ഥാപിച്ച മലിനജല സംസ്കരണ പ്ലാ​ന്റ് പ്രവർത്തനക്ഷമമല്ല. നാട്ടുകാരുടെ നിരന്തര പരാതിയെതുടർന്ന് പ്ലാ​ന്റ് നവീകരണത്തിന് 85 ലക്ഷം രൂപ അനുവദിച്ചു. എന്നാൽ നവീകരണ പ്രവർത്തനങ്ങൾ ഇഴയുകയാണ്. പ്ലാന്റിലേക്ക് എത്താത്തതിനാൽ കളക്ഷൻ ടാങ്കിലേക്ക് എത്തുന്ന മാലിന്യം അവിടെ നിന്നുതന്നെ നിറ‍ഞ്ഞാഴുകുകയാണ്.

മലിനജലം ചാത്തന്നൂർ - കോനാകരി തോടിലൂടെ പെണ്ണാർ തോട്ടിലെത്തി നേരെ വേമ്പനാട്ട് കായലിലാണ് എത്തുന്നത്. തോടി​ന്റെ വശങ്ങളിൽ മാലിന്യം അടിഞ്ഞുകൂടുകയാണ്. രൂക്ഷമായ ദുർ​ഗന്ധവുമുണ്ട്. ഇത് പ്രദേശവാസികൾക്ക് ​ഗുരുതര ആരോ​ഗ്യപ്രശ്നങ്ങൾക്കും ഇടയാക്കുമെന്നാണ് ആശങ്ക. അടിയന്തര നടപടി സ്വീകരിക്കണമെന്നാവശ്യപ്പെട്ട് നാട്ടുകാർ കളക്ടർക്കും, എം.എൽ.എ യ്ക്കും ഉൾപ്പെടെ പരാതി നൽകിയിരുന്നു. എന്നാൽ ആഴ്ചകൾ പിന്നിട്ടും ഇതിന് പരിഹാരമായില്ല.



വൈകിട്ടായാൽ മെഡിക്കൽ കോളേജിൽ നിന്ന് മലിനജലം പുറത്തേക്ക് ഒഴുകാൻ തുടങ്ങും. മൂക്കുപൊത്തി കഴിയേണ്ട അവസ്ഥയാണ്. ഒഴുക്കിവിടുന്ന മലിനജലം കായലിലേക്ക് എത്തും. പ്രശ്നത്തിന് ശാശ്വതപരിഹാരം ഉണ്ടാവണം

റോസ്ലിൻ ടോമിച്ചൻ (ആർപ്പൂക്കര വാർഡ് മെമ്പർ)