കോട്ടയം : അയ്മനം ഫെസ്റ്റിനോടനുബന്ധിച്ച് അയ്മനം ദേവസ്വം ബോർഡ് ഓഡിറ്റോറിയത്തിൽ നടക്കുന്ന പ്രദർശനവിപണന മേള ഗ്രാമപഞ്ചായത്ത് പ്രസിഡന്റ് സബിതാ പ്രേംജി ഉദ്ഘാടനം ചെയ്തു. സാംസ്‌കാരിക വകുപ്പിന്റെയും അയ്മനം ഗ്രാമപഞ്ചായത്തിന്റെയും അയ്മനം, കുടമാളൂർ, മര്യാതുരുത്ത് സർവീസ് സഹകരണ ബാങ്കുകളുടെയും സംയുക്താഭിമുഖ്യത്തിൽ 'അരങ്ങ് 2022 'എന്ന പേരിലാണ് ഫെസ്റ്റ് സംഘടിപ്പിക്കുന്നത്. കുടുംബശ്രീ സംരംഭകരുടെയും വിവിധ സ്വയംതൊഴിൽ സംരംഭകരുടെയും വിവിധ വകുപ്പുകളുടേതുമായി 40 സ്റ്റാളുകളാണ് ഒരുക്കിയിട്ടുള്ളത്. വനിതകളുടെ വടംവലി മത്സരം, എട്ടുകളി മത്സരം, കുട്ടികളുടെയും കുടുംബശ്രീ പ്രവർത്തകരുടെയും വിവിധ കലാകായിക മത്സരങ്ങൾ എന്നിവ ഇന്നലെ അരങ്ങേറി. വിളംബര റാലിയും നടന്നു. ഉദ്ഘാടനം ഇന്ന് വൈകിട്ട് അഞ്ചിന് അയ്മനം നരസിംഹ സ്വാമി ക്ഷേത്ര ഓഡിറ്റോറിയത്തിൽ മന്ത്രി വി.എൻ. വാസവൻ നിർവഹിക്കും. അയ്മനം ഗ്രാമപഞ്ചായത്ത് പ്രസിഡന്റ് സബിത പ്രേംജി അദ്ധ്യക്ഷയാകും. ജോസ് കെ. മാണി എം.പി മുഖ്യാതിഥിയാവും. ചലച്ചിത്രതാരം മധുപാൽ ഫെസ്റ്റ് സന്ദേശം നൽകും. ബ്ലോക്ക് പഞ്ചായത്ത് പ്രസിഡന്റ് ആര്യാ രാജൻ, ജില്ലാപഞ്ചായത്തംഗങ്ങളായ കെ.വി. ബിന്ദു, ഡോ. റോസമ്മ സോണി, ഗ്രാമപഞ്ചായത്ത് വൈസ് പ്രസിഡന്റ് മനോജ് കരീമഠം, ബ്ലോക്ക് പഞ്ചായത്ത് ക്ഷേമകാര്യ സ്ഥിരംസമിതി അധ്യക്ഷൻ കെ. കെ ഷാജിമോൻ, ബ്ലോക്ക് പഞ്ചായത്തംഗം കെ.വി. രതീഷ്, ഗ്രാമപഞ്ചായത്ത് സ്ഥിരംസമിതി അധ്യക്ഷരായ വിജി രാജേഷ്, കെ.ആർ. ജഗദീഷ്, കെ. ദേവകി, ഗ്രാമപഞ്ചായത്തംഗം പ്രമോദ് തങ്കച്ചൻ എന്നിവർ പങ്കെടുക്കും. 30 വരെയാണ് ഫെസ്റ്റ്.