 ഈവർഷം പണമൊഴുക്ക് $10,000 കോടി കവിയും

കൊച്ചി: ഏറ്റവുമധികം പ്രവാസിപ്പണം നേടുന്ന രാജ്യമെന്ന പട്ടം 2022ലും ഇന്ത്യ നിലനിറുത്തുമെന്ന് ലോകബാങ്കിന്റെ റിപ്പോർട്ട്. 2021നേക്കാൾ 12 ശതമാനം വളർച്ചയോടെ പണമൊഴുക്ക് ചരിത്രത്തിൽ ആദ്യമായി 10,​000 കോടി ഡോളർ ഈവർഷം കടക്കുമെന്ന് റിപ്പോർട്ട് പ്രവചിക്കുന്നു.

പ്രവാസിപ്പണമൊഴുക്കിൽ തുടർച്ചയായി ഒന്നാംസ്ഥാനം നിലനിറുത്തുന്ന ഇന്ത്യ കഴിഞ്ഞവർഷം നേടിയത് 8,​700 കോടി ഡോളറായിരുന്നു. ചൈന,​ മെക്‌സിക്കോ (5,​300 കോടി ഡോളർ വീതം)​,​ ഫിലിപ്പൈൻസ് (3,​600 കോടി ഡോളർ)​,​ ഈജിപ്‌ത് (3,300 കോടി ഡോളർ)​ എന്നിവയാണ് യഥാക്രമം ഇന്ത്യയ്ക്ക് തൊട്ടുപിന്നാലെയുണ്ടായിരുന്നത്.

ഈവർഷവും ഈ രാജ്യങ്ങളെ ഇന്ത്യ ബഹുദൂരം പിന്നിലാക്കും. താരതമ്യേന കുറഞ്ഞ തൊഴിൽവൈദഗ്ദ്ധ്യം ആവശ്യമുള്ളതും വരുമാനം കുറഞ്ഞതുമായ ഗൾഫ് രാജ്യങ്ങളിൽ നിന്നുമാറി ഉയർന്ന വൈദഗ്ദ്ധ്യവും വരുമാനവുമുള്ള അമേരിക്ക,​ ബ്രിട്ടൻ,​ ജപ്പാൻ,​ സിംഗപ്പൂർ,​ ഓസ്‌ട്രേലിയ,​ ന്യൂസിലൻഡ് എന്നിവിടങ്ങളിൽ നിന്നുള്ള പണമൊഴുക്ക് ഉയർന്നതാണ് ഇന്ത്യയ്ക്ക് കൂടുതൽ കരുത്താവുന്നത്.

വിദേശ നിക്ഷേപത്തേക്കാൾ മുന്നിൽ

ഈവർഷം ഇന്ത്യയിലേക്ക് നേരിട്ടുള്ള വിദേശ നിക്ഷേപമായി (എഫ്.ഡി.ഐ)​ 8,​000 കോടി ഡോളർ എത്തുമെന്നാണ് കേന്ദ്രസർക്കാരിന്റെ പ്രതീക്ഷ. ഇതിനേക്കാൾ 25 ശതമാനം അധികമായിരിക്കും പ്രവാസിപ്പണമൊഴുക്ക്.

ഗൾഫ് പിന്നിലേക്ക്

ഇന്ത്യയുടെ പരമ്പരാഗത പ്രവാസിപ്പണ സ്രോതസുകളായ ജി.സി.സി രാജ്യങ്ങളുടെ (സൗദി അറേബ്യ,​ യു.എ.ഇ.,​ കുവൈറ്റ്,​ ഒമാൻ,​ ഖത്തർ)​ വിഹിതം 2016-17ൽ നിന്ന് 2020-21ലേക്ക് എത്തിയപ്പോൾ 54 ശതമാനത്തിൽ നിന്ന് 28 ശതമാനത്തിലേക്ക് ഇടിഞ്ഞു.

അമേരിക്ക,​ ബ്രിട്ടൻ,​ സിംഗപ്പൂർ എന്നിവിടങ്ങളിൽ നിന്നുള്ള വിഹിതം 26 ശതമാനത്തിൽ നിന്ന് 36 ശതമാനമായി. 2020-21ൽ 23 ശതമാനം വിഹിതത്തോടെ യു.എ.ഇ പിന്നിലാക്കി അമേരിക്ക ഒന്നാംസ്ഥാനവും നേടി.

മുന്നിൽ മഹാരാഷ്‌ട്ര

ഇന്ത്യയിലേക്കുള്ള മൊത്തം പ്രവാസിപ്പണത്തിന്റെ 19 ശതമാനവും കേരളത്തിലേക്കായിരുന്നു. ഇത് 2020-21ൽ 10.2 ശതമാനമായി കുറഞ്ഞു. വിഹിതം 16.7ൽ നിന്ന് 35.2 ശതമാനമായി മെച്ചപ്പെടുത്തിയ മഹാരാഷ്‌ട്ര കേരളത്തിൽ നിന്ന് ഒന്നാംസ്ഥാനവും പിടിച്ചെടുത്തു.

21%

ഇന്ത്യയിലേക്ക് ഒഴുകുന്ന പ്രവാസിപ്പണത്തിന്റെ 21 ശതമാനവും എത്തുന്നത് കേരളം ആസ്ഥാനമായുള്ള ഫെഡറൽ ബാങ്കിലേക്കാണ്.