ഹൈദരാബാദ്: എ.ടി.എമ്മിൽ നിന്ന് പണമെടുക്കുന്നതുപോലെ ഇനി സ്വർണവും നേടാം. ഡെബിറ്റ്/ക്രെഡിറ്റ് കാർഡുകൾ ഉപയോഗിച്ച് സ്വർണനാണയങ്ങൾ എടുക്കാവുന്ന എ.ടി.എം ഒരുക്കിയിരിക്കുകയാണ് ഹൈദരാബാദ് ആസ്ഥാനമായ ഗോൾഡ്സിക്ക പ്രൈവറ്റ് ലിമിറ്റഡ്. ഇന്ത്യയിലെ ആദ്യ ' റിയൽടൈം ഗോൾഡ് ഡിസ്‌പെൻസിംഗ് മെഷീനാണ്" ഇതെന്ന് കമ്പനി അഭിപ്രായപ്പെട്ടു.

ഹൈദരാബാദിലെ ബീഗംപേട്ടിലുള്ള കമ്പനിയുടെ ഓഫീസിലാണ് ഗോൾഡ് എ.ടി.എം സ്ഥാപിച്ചത്. രണ്ടുവർഷത്തിനകം ഇന്ത്യയിലെമ്പാടുമായി 3,​000 ഗോൾഡ് എ.ടി.എമ്മുകൾ സ്ഥാപിക്കുകയാണ് കമ്പനിയുടെ ലക്ഷ്യം. 0.5 ഗ്രാം,​ ഒരു ഗ്രാം,​ രണ്ടുഗ്രാം,​ 5 ഗ്രാം,​ 10 ഗ്രാം,​ 20 ഗ്രാം,​ 50 ഗ്രാം,​ 100 ഗ്രാം എന്നിങ്ങനെ അളവിലെ സ്വർണനാണയങ്ങളാണ് ഗോൾഡ് എ.ടി.എമ്മിൽ ലഭിക്കുക.

ബാങ്കിംഗ് സിസ്‌റ്റവുമായും സ്വർണവില നിർണയ സംവിധാനങ്ങളുമായും ബന്ധിപ്പിച്ച് അതിസുരക്ഷാ സംവിധാനങ്ങളോടെയാണ് എ.ടി.എം ഒരുക്കിയിട്ടുള്ളത്. യൂറോപ്പ്,​ ഗൾഫ്,​ അമേരിക്ക എന്നിവിടങ്ങളിൽ നിലവിൽ ഗോൾഡ് എ.ടി.എമ്മുകളുണ്ടെന്ന് കമ്പനി വ്യക്തമാക്കി.