ഹരിപ്പാട്: ക്ഷേത്ര ദർശനം കഴിഞ്ഞു സ്കൂട്ടറിൽ മടങ്ങവേ ജില്ലാ പഞ്ചായത്ത് മുൻ അംഗവും ഡി.സി.സി ജനറൽ സെക്രട്ടറിയുമായ ചിങ്ങോലി ആരഭിയിൽ ശ്രീദേവി രാജൻ (58) കാറിടിച്ചു മരിച്ചു. ദേശീയപാതയിൽ കാഞ്ഞൂർ ക്ഷേത്രത്തിനു സമീപം ഇന്നലെ രാവിലെ 8.10നായിരുന്നു അപകടം.

കളിയിക്കാവിള സ്വദേശികൾ സഞ്ചരിച്ച കാർ സ്കൂട്ടറിനു പിന്നിൽ ഇടിക്കുകയായിരുന്നു. സ്കൂട്ടറിൽ നിന്നു തെറിച്ച ശ്രീദേവി കാറിന്റെ ചില്ലിലും ബോണറ്റിലും വീണശേഷം തലയടിച്ച് റോഡിൽ വീഴുകയായിരുന്നു. ഉടൻ നാട്ടുകാർ ഹരിപ്പാട് താലൂക്ക് ആശുപത്രിയിൽ എത്തിച്ചെങ്കിലും മരണം സംഭവിച്ചിരുന്നു. തലയ്‌ക്കേറ്റ ഗുരുതര പരിക്കാണ് മരണകാരണം. തലയുടെ പിൻഭാഗം ഇടിച്ചാണ് വീണത്. ഉടൻ അബോധാവസ്ഥയിലായി. മൃതദേഹം ഹരിപ്പാട് താലൂക്ക് ആശുപത്രി മോർച്ചറിയിൽ. കാർത്തികപ്പള്ളി താലൂക്ക് എൻ.എസ്.എസ് മഹിളാ സമാജം മുൻ പ്രസിഡന്റ്, കാർത്തികപ്പള്ളി ഗ്രാമപഞ്ചായത്ത് സാക്ഷരത പ്രേരക് പ്രവർത്തക,നങ്ങ്യാർകുളങ്ങര ടി.കെ.എം.എം കോളേജ് യൂണിയൻ മുൻ വൈസ് ചെയർമാൻ എന്നീ നിലകളിൽ ശ്രീദേവി പ്രവർത്തിച്ചിട്ടുണ്ട്. ഭർത്താവ്:രാജൻ പിള്ള. മക്കൾ:ഡോ. എസ്. ആര്യ,അർജുൻ. മരുമക്കൾ: ഡോ. സനോജ്,വൃന്ദ. സംസ്കാരം നാളെ വൈകിട്ട് 3ന് വീട്ടുവളപ്പിൽ.