ടോക്കിയോ : വ്യത്യസ്തമായ പഴങ്ങളുടെ പേരിൽ പ്രസിദ്ധമാണ് ജപ്പാൻ. സ്ട്രോബറി, മുന്തിരി, ഓറഞ്ച് തുടങ്ങിയ പഴങ്ങളുടെ വൈവിദ്ധ്യമാർന്നയിനങ്ങൾ ജപ്പാനിലുണ്ട്. വളരെ ഉയർന്ന വിലയാണെങ്കിലും വിദേശമാർക്കറ്റുകളിൽ ഇവയ്ക്ക് ആവശ്യക്കാരേറെയാണ്. ജപ്പാനിൽ ഉത്ഭവിച്ച ചില ഇനങ്ങൾ ഇപ്പോൾ വിദേശരാജ്യങ്ങളിലും വ്യാപകമായി വളർത്തുന്നുണ്ട്.

ഇത്തരത്തിൽ ജാം, ജെല്ലി, ഡിസേർട്ടുകൾ തുടങ്ങിയ വിഭവങ്ങളിലൂടെ ഷെഫുകൾക്കിടെയിൽ പ്രിയങ്കരനാണ് ജപ്പാൻ സ്വദേശിയായ ' ഡെക്കോപ്പോൺ '. ജപ്പാന് പുറത്ത്, പ്രധാനമായും വടക്കേ അമേരിക്കയിലും മറ്റും ' സുമോ സിട്രസ് ഓറഞ്ച്" ഇത് എന്നാണ് അറിയപ്പെടുന്നത്. കണ്ടാൽ ശരിക്കും ഓറഞ്ചിനെ പോലെയാണ് രൂപം. 1970കളിലാണ് ജപ്പാനിൽ സുമോ ഓറഞ്ച് വികസിപ്പിച്ചത്. നാരക വർഗ്ഗത്തിൽപ്പെട്ട കിയോമി, പോങ്കോൻ സിട്രസ് എന്നിവയുടെ സങ്കരയിനമാണിത്.

പക്ഷേ, ആകൃതിയിലും സ്വഭാവത്തിലുമൊക്കെ വ്യത്യാസങ്ങളേറെയാണ് മാൻഡരിൻ ഓറഞ്ചിന്റെ കുടുംബത്തിൽപ്പെട്ട ഈ സിട്രസ് ഫലത്തിന്. വലിപ്പം കൂടിയ പുറംഭാഗവും മുകളിൽ ചെറിയ ഉരുണ്ട ഭാഗവുമുണ്ട്. ഇത് കാഴ്ചയിൽ ജപ്പാനിലെ സുമോ ഗുസ്തിക്കാരുടെ മുഖം സ്മരിപ്പിക്കുന്നു. ഇത് തന്നെയാണ് ഡെക്കോപ്പോണ് പാശ്ചാത്യർ സുമോ ഓറഞ്ച് എന്ന പേര് നൽകാൻ കാരണം. ഓസ്ട്രേലിയൻ വിപണിയിലും ഇക്കൂട്ടർ പ്രമുഖരായി കഴിഞ്ഞു.

വളരെ മധുരമുള്ള സുമോ ഓറഞ്ച് ജപ്പാനിലെ ശൈത്യകാലയളവായ ഡിസംബർ മുതൽ ഫെബ്രവരി മാസങ്ങൾക്കിടെ മാത്രമേ വളരുകയുള്ളു. ഉള്ളിൽ വിത്തുകളില്ലാത്ത സുമോ ഓറഞ്ചുകളുടെ തൊലി വളരെ എളുപ്പത്തിൽ വേർപ്പെടുത്താനാകും.