കണ്ണൂർ: കൗമാരപ്രായത്തിൽ ആൺകുട്ടികളെയും പെൺകുട്ടികളെയും ഒന്നിച്ചിരുത്തി പഠിപ്പിക്കുന്നതിനെതിരെ വിവാദ പ്രസ്താവനയുമായി മുസ്ലീം ലീഗ് നേതാവ് അബ്ദുറഹ്മാൻ രണ്ടത്താണി. നാടിന്റെ സംസ്കാരം എന്താവുമെന്നും പഠിപ്പിക്കുന്നത് സ്വയംഭോഗവും സ്വവർഗരതിയുമാണെന്നും വിദ്യാഭ്യാസ പരിഷ്കാര നീക്കത്തെ വിമർശിച്ച് രണ്ടത്താണി പറഞ്ഞു. ലൈംഗിക വിദ്യാഭ്യാസം അടിച്ചേൽപ്പിക്കേണ്ടതല്ലെന്നും കണ്ണൂരിൽ നടന്ന യുഡിഎഫ് പ്രതിഷേധക്കൂട്ടായ്മയിൽ അബ്ദുറഹ്മാൻ രണ്ടത്താണി പറഞ്ഞു.

'വിദ്യാഭ്യാസ രംഗത്ത് പെൺകുട്ടികൾക്ക് വലിയ പ്രാധാന്യമുണ്ട്. ഏത് കോളേജിലും 70 - 80 ശതമാനത്തോളം പെൺകുട്ടികളാണ്. വിദ്യാഭ്യാസത്തിൽ അവർ ഒരുപാട് വളർച്ച നേടിയിട്ടുണ്ട്. അതൊന്നും ഒരുമിച്ച് ഇരുത്തിയിട്ടല്ല. കൗമാരകാലത്ത് ആൺകുട്ടികളെയും പെൺകുട്ടികളെയും ഒരുമിച്ച് ഇരുത്തിയാൽ വിദ്യാഭ്യാസ രംഗത്ത് വലിയ മാറ്റങ്ങൾ ഉണ്ടാകുമത്രേ. എന്നിട്ടോ, പഠിപ്പിക്കേണ്ട വിഷയം കേൾക്കുമ്പോഴാണ്... എന്തൊക്കെയാണെന്നോ സ്വയംഭോഗവും സ്വവർഗരതിയും.' - എന്നാണ് രണ്ടത്താണി പറഞ്ഞത്.