തിരുവനന്തപുരം : ബഫർസോൺ വിഷയത്തിൽ വനമേഖലയ്ക്ക് സമീപം താമസിക്കുന്ന കർഷകരെ സർക്കാർ വഞ്ചിക്കുകയാണെന്ന് പ്രതിപക്ഷ നേതാവ് വി.ഡി. സതീശൻ പറഞ്ഞു. നേരിട്ടുള്ള പരിശോധനയില്ലാതെ ഉപഗ്രഹ സർവേ റിപ്പോർട്ട് മാത്രം പരിഗണിച്ച് ബഫർസോൺ നിശ്ചയിക്കാനുള്ള സർക്കാർ നീക്കം അംഗീകരിക്കില്ല. ഇക്കാര്യത്തിൽ ജനങ്ങളെ അണിനിരത്തി പ്രതിരോധിക്കുമെന്നും സതീശൻ അറിയിച്ചു.

പ്രാദേശികമായ ഒരു പരിശോധനയും ഇല്ലാതെ ബഫർസോൺ മാപ്പ് തയ്യാറാക്കിയത് ജനങ്ങളെ വഞ്ചിക്കുന്നതിന് തുല്യമാണ്.കാർഷിക മേഖലകളായ ഇടപമ്പാവാലി,​ ഏയ്ഞ്ചൽവാലി വാർഡുകൾ പൂർണമായും വനഭൂമിയാണെന്ന കണ്ടെത്തൽ ഉപഗ്രഹ സർവേ റിപ്പോർട്ടിന്റെ അശാസ്ത്രീയത വ്യക്തമാക്കുന്നതാണെന്നും സതീശൻ ചൂണ്ടിക്കാണിച്ചു. ജനവാസ മേഖലകളും കൃഷിയിടവും ഉൾപ്പെടുത്തി അശാസ്ത്രീയമായി ഉപഗ്രഹ സർവേ നടത്തിയതാണ് ജനങ്ങളെ വെട്ടിലാക്കിയിരിക്കുന്നത്. സർക്കാർ നീക്കത്തെ ജനങ്ങളെ അണിനിരത്തി യു.ഡി.എഫ് പ്രതിരോധിക്കുമെന്നും അദ്ദേഹം പറഞ്ഞു.