തിരുവനന്തപുരം: മുഖ്യമന്ത്രി പിണറായി വിജയൻ പങ്കെടുത്ത കേരള അഡ്മിനിസ്‌ട്രേറ്റീവ് ട്രൈബ്യൂണലിന്റെ 11ാം വാർഷികാഘോഷചടങ്ങിനിടെ വൈദ്യുതി ബന്ധം നിലച്ചു. ഇന്നലെ കോവളം ക്രാഫ്ട് വില്ലേജിൽ ആയിരുന്നു ചടങ്ങ്. ഉദ്ഘാടകനായ മുഖ്യമന്ത്രി പ്രസംഗം നിറുത്തിയ ഉടനെയായിരുന്നു സ്റ്റേജിലെയും സദസിലെയും വൈദ്യുതി നിലച്ചത്.

ഇതോടെ അൽപസമയം, മൈക്കിന് സമീപത്ത് മുഖ്യമന്ത്രി നിന്നു. സുരക്ഷാ ഉദ്യോഗസ്ഥർ ടോർച്ചുമായി പാഞ്ഞത്തി മുഖ്യമന്ത്രിക്ക് വഴികാണിച്ചു. പ്രസംഗ ശേഷം മുഖ്യമന്ത്രിക്ക് ഉപഹാരം നൽകാൻ കെ.എ.ടി തീരുമാനിച്ചിരുന്നു.

തുടർന്ന് ടോർച്ചിന്റെ വെളിച്ചത്തിൽമുഖ്യമന്ത്രി ഉപഹാരം സ്വീകരിച്ചു. ടോർച്ച് വെളിച്ചത്തിൽ തന്നെയാണ് മുഖ്യമന്ത്രി വേദിവിട്ടതും അദ്ദേഹം ഔദ്യോഗിക വാഹനത്തിൽ കയറിയതിന് പിന്നാലെ വൈദ്യുതി ബന്ധം പുനഃസ്ഥാപിക്കുകയും ചെയ്തു.