ചെർപ്പുളശ്ശേരി: പട്ടാപകൽ അടച്ചിട്ട വീടുകളിൽ കയറി സ്വർണവും പണവും കവർന്ന കേസിൽ തൃക്കടീരി വീരമംഗലം തച്ചമ്പറ്റ ശിവദാസനെ (28) പൊലീസ് അറസ്റ്റ് ചെയ്തു. രണ്ടുമാസത്തിനിടെ സ്റ്റേഷൻ പരിധിയിലെ രണ്ട് വീടുകളിൽ കവർച്ച നടന്നതിലെ അന്വേഷണത്തിലാണ് ശിവദാസനെ പൊലീസ് പിടികൂടിയത്.
പകൽ വീട് പൂട്ടി പുറത്തുപോകുന്നവരെ നിരീക്ഷിച്ച് വാതിലും അലമാരയും മേശകളും തകർത്ത് കവർച്ച നടത്തുന്നതാണ് രീതി. ചെർപ്പുളശ്ശേരിയിൽ മാത്രം ആറിടങ്ങളിൽ കവർച്ച നടത്തിയെന്ന് പ്രതി സമ്മതിച്ചതായി പൊലീസ് പറഞ്ഞു. ശ്രീകൃഷ്ണപുരത്തും രണ്ടിടത്ത് കവർച്ച നടത്തിയിട്ടുണ്ട്. ആദ്യമായാണ് ഇയാൾ പൊലീസ് പിടിയിലാവുന്നത്. ഒറ്റപ്പാലം സ്റ്റേഷൻ പരിധിയിൽ സമാന കവർച്ച നടന്നതും പരിശോധിക്കുന്നുണ്ട്.

ചെർപ്പുളശ്ശേരിയിൽ നിന്ന് വ്യാഴാഴ്ച രാത്രിയാണ് പ്രതിയെ അറസ്റ്റ് ചെയ്തത്. സ്റ്റേഷൻ ഹൗസ് ഓഫീസർ ടി.ശശികുമാർ, എസ്.ഐമാരായ ബി.പ്രമോദ്, ബിനുമോഹൻ, എ.എസ്.ഐ ഉണ്ണികൃഷ്ണൻ, പി.രാജീവ്, അജീഷ്, വിനു ജോസഫ്, എ.ഉദയൻ എന്നിവരുടെ നേതൃത്വത്തിലാണ് അന്വേഷണം.