തിരുവല്ല: അതുല്യനടൻ എം.ജി സോമന്റെ ഓർമ്മയ്ക്ക് 25 വർഷം പൂർത്തിയായ ഇന്നലെ ആരാധകരും ജന്മനാടും സ്മരണാഞ്ജലി അർപ്പിച്ചു. തിരുമൂലപുരത്ത് സോമന്റെ മണ്ണടിപ്പറമ്പ് വീട്ടിൽ പത്നി സുജാത സോമൻ ഭദ്രദീപം തെളിയിച്ചതോടെ അനുസ്മരണദിന പരിപാടിക്ക് തുടക്കമായി. തുടർന്ന് ഛായാചിത്രത്തിനു മുമ്പിൽ പുഷ്പാർച്ചനയും അനുസ്മരണ പ്രഭാഷണങ്ങളും നടന്നു. ആസാദ് നഗർ റസിഡന്റ്സ് അസോസിയേഷന്റെയും എം.ജി.സോമൻ ഫൗണ്ടേഷന്റെയും സംയുക്താഭിമുഖ്യത്തിലാണ് പരിപാടികൾ നടത്തിയത്. എം.ജി.സോമൻ ഫൗണ്ടേഷൻ ചെയർമാനും സംവിധായകനുമായ ബ്ലെസി, ആസാദ് നഗർ റസി.അസോസിയേഷൻ സെക്രട്ടറി സന്തോഷ് അഞ്ചേരിൽ, അസോസിയേഷൻ മുൻ പ്രസിഡന്റും ജില്ലാ ജുവനൈൽ ജസ്റ്റിസ് ബോർഡ് അംഗവുമായ ഡോ.ആർ.വിജയമോഹനൻ, ഫൗണ്ടേഷൻ വർക്കിംഗ് ചെയർമാൻ ജോർജ്ജ് മാത്യു, എം.ജി.സോമന്റെ മകനും നടനുമായ സാജി സോമൻ, മകൾ സിന്ധു സോമൻ, ഗ്രൂപ്പ് ക്യാപ്റ്റൻ ജി.ജി കുമാർ, ചലച്ചിത്രനടൻമാരായ കൃഷ്ണപ്രസാദ്, മോഹൻ അയിരൂർ, തിരക്കഥാകൃത്ത് ചെറിയാൻ കല്പകവാടി, അഡ്വ.ഡി.വിജയകുമാർ, കെ.എം.അബൂബക്കർ, വി.രവീന്ദ്രൻ നായർ, ജോസ് പെരുന്തുരുത്തി, എക്സ് സർവീസ്മെൻ കോർഡിനേഷൻ കമ്മിറ്റി ജില്ലാപ്രസിഡന്റ് ജി.ആർ.പിള്ള, എസ്.കൈലാസ്, ടി.എൻ.സുരേന്ദൻ എന്നിവർ അനുസ്മരിച്ചു. എം.ജി സോമന്റെ 25-ാം വാർഷികാനുസ്മരണത്തിന്റെ ഭാഗമായി വിവിധ പരിപാടികളാണ് സംഘടിപ്പിച്ചിട്ടുള്ളത്. ലഹരിവിമുക്ത കാമ്പയിൻ, സ്കൂൾ കലോത്സവം, നാടക മത്സരങ്ങൾ എന്നിവ കഴിഞ്ഞ ദിവസങ്ങളിൽ സംഘടിപ്പിച്ചിരുന്നു. 19ന് കമലഹാസൻ ഉൾപ്പെടെയുള്ള പ്രമുഖ സിനിമാ താരങ്ങൾ പങ്കെടുക്കുന്ന സ്മൃതി സന്ധ്യയോടു കൂടി അനുസ്മരണ പരിപാടികൾക്ക് തിരശീല വീഴും.