മല്ലപ്പള്ളി : കീഴ് വായ്പൂര് - നെയ്തേലിപ്പടി - നാരകത്താനി റോഡിൽ ചാക്കമറ്റത്തെ ഇടുങ്ങിയ പാലം അപകടക്കെണിയാകുന്നു. കോട്ടയം - കോഴഞ്ചേരി സംസ്ഥാനപാതയിൽ നെയ്തേലിപ്പടിയിൽ നിന്ന് പടുതോട് - എഴുമറ്റൂർ ബാസ്റ്റോ റോഡിലെ നാരകത്താനിയുമായി ബന്ധിപ്പിക്കുന്ന പ്രധാന പാതയിലെ ചാക്കമറ്റത്തെ പാലം നിർമ്മിച്ചിട്ട് 61 വർഷങ്ങൾ കഴിഞ്ഞു. ഇരുറോഡുകളെയും ബന്ധിപ്പിക്കുന്നതിനാൽ ഒട്ടേറെ വാഹനങ്ങളാണ് ഇതുവഴി കടന്നുപോകുന്നത്. 1961 മാർച്ച് 3ന് ഗതാഗതത്തിനായി തുറന്നുകൊടുത്ത പാലം അക്കാലത്തുണ്ടായിരുന്ന പാലം നിർമ്മാണത്തിന് പേരുകേട്ട എൻ.ഇ.എസ് ബ്ലോക്കാണ് നിർമ്മാണം നടത്തിയത്. വാഹനങ്ങളുടെ വലിയ തിരക്കില്ലാത്ത അക്കാലത്ത് വീതി പര്യാപ്തമായിരുന്നു. എന്നാൽ ഇന്ന് വാഹനങ്ങളുടെ തിരക്ക് വർദ്ധിച്ചത് യാത്രയ്ക്ക് തടസം സൃഷ്ടിക്കുന്നു. പാറത്തോടിന് കുറുകയുള്ള പാലത്തിന്റെ ഇരുദിശകളും താഴ്ന്നു കിടക്കുന്നതും, പാലത്തിന്റെ സമീപത്തെ വലിയ വളവുകളും കാരണം അപകട സാദ്ധ്യത നിലനില്ക്കുന്നു. 6പതിറ്റാണ്ടിലേറെ പഴക്കമുള്ള പാലത്തിന്റെ നിലനിൽപ്പും ഭീഷണിയിലാണ്.

ഭീതിയിൽ നാട്ടുകാർ

പാലത്തിന്റെ അടിത്തട്ടിലെ ചില ഭാഗങ്ങളിൽ കോൺക്രീറ്റ് ഇളകി മാറി ഇരുമ്പ് കമ്പികൾ പുറത്തെത്തിയതും കാണാൻ കഴിയും. ഇരുവശങ്ങളിലേയും കോൺക്രീറ്റ് ഉറപ്പിച്ചിരിക്കുന്ന കരിങ്കൽ ഭിത്തികൾക്കും കേടുപാടുകൾ സംഭവിച്ചിട്ടുണ്ട്. അമിത ഭാരം കയറ്റി വരുന്ന വലിയ വാഹനങ്ങളുടെ തുടരെയുള്ള സഞ്ചാരം പാലം തകരുമോ എന്ന ഭീതിയും നാട്ടുകാർക്കിടയിലുണ്ട്. പ്രളയത്തിൽ പാലത്തോട് ചേർന്ന് തോടിന്റെ സംരക്ഷണഭിത്തികൾ തകർന്നത് പുനസ്ഥാപിക്കുവാൻ പ്രദേശവാസികൾ മുൻകൈയെടുത്തിയിട്ടും അധികാരികൾ തിരിഞ്ഞു നോക്കിയില്ലെന്ന ആക്ഷേപവും നാട്ടുകാർക്കിടയിലുണ്ട്. 2021-22 പദ്ധതി വർഷം ജില്ലാ പഞ്ചായത്തിൽ നിന്ന് അനുവദിച്ച 20 ലക്ഷം രൂപയുടെ റോഡ് നവീകരണം നടത്തിയെങ്കിലും പാലത്തിന്റെ കാര്യത്തിൽ ഇന്നും അധികൃതർ നിസംഗത കാട്ടുകയാണെന്ന് പ്രദേശവാസികൾ ആരോപിച്ചു.

..................................

സമീപപ്രദേശത്തെ ഇടുങ്ങിയ പാലങ്ങളുടെ നിർമ്മാണങ്ങൾ പൂർത്തിയായിട്ടും നിരവധി വാഹനങ്ങൾ ദിവസേന കടന്നുപോകുന്ന ചാക്കമറ്റം പാലത്തിന്റെ കാര്യത്തിൽ അധികാരികൾ മൗനംപാലിക്കുകയാണ്. അടിയന്തരമായി പുതിയ പാലം നിർമ്മിക്കുന്നതിന് ആവശ്യമായ നടപടികൾ സ്വീകരിക്കണമെന്നാണ് പ്രദേശവാസികളായ ഞങ്ങളുടെ ആവശ്യം.

രഘു എം.ആർ

(പ്രദേശവാസി)

............................

-20 ലക്ഷത്തിന്റെ നവീകരണം നടത്തിയിട്ടും ഫലമില്ല

- 61 വർഷമായ പാലം

-കോൺക്രീറ്റ് ഇളകി മാറി